މިދިޔަ އަހަރުގެ ފަހު ކުއާޓަރުގައި ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އަށް 3.23 ބިލިއަން ރުފިޔާގެ ގެއްލުންވެއްޖެއެވެ.

ޕްރައިވެޓައިޒޭޝަން އެންޑް ކޯޕަރޭޝަން ބޯޑުން އާއްމުކުރި މިދިޔަ އަހަރުގެ ފަހު ކުއާޓަރުގައި ދައުލަތުގެ ކުންފުނިތަކުގެ މާލީ ރިވީއު ރިޕޯޓްގައިވާ ގޮތުން، އެޗްޑީސީ އަށް ވަނީ ޖުމްލަ އާމްދަނީގެ ގޮތުގައި 1.47 ބިލިއަން ރުފިޔާ ލިބިފައެވެ. މިއީ އެ އަހަރުގެ ތިން ވަނަ ކުއާޓަރަށް ވުރެ 704 މިލިއަން ރުފިޔާ އިތުރު އަދަދެކެވެ.

އޭގެ ކުރީއަހަރުގެ ފަހު ކުއާޓަރުގައި އެޗްޑީސީއަށް ލިބުނީ، 517.86 މިލިއަނެވެ. ނަމަވެސް 2023 ވަނަ އަހަރުގެ ފަހު ކުއާޓަރުގައި 955.88 މިލިއަން ރުފިޔާ އިތުރުވުމާއިއެކު، 185% އަށް މި އަދަދު ވަނީ ކުރިއަރާފައެވެ.

އެހެންނަމަވެސް، މިދިޔަ އަހަރު އެޗްޑީސީ ހިންގުމަށް ކުރި ހަރަދުތަކުން އެބައި އުނިކޮށްލުމުން ކުންފުންޏަށް ލިބުނީ ބޮޑު ގެއްލުމެކެވެ. އެގޮތުން ގްރޮސް ޕްރޮފިޓްގެ ގޮތުގައި ލިބުނު 693 މިލިއަން ރުފިޔާ އިން ހަރަދުތައް އުނިކުރުމުން އެ ކުންފުންޏަށް ވަނީ 3.25 ބިލިއަން ރުފިޔާގެ ގެއްލުމާއި ކުރިމަތިލާން ޖެހިފައެވެ.

އެ ކުންފުޏަށް މިފަދަ ގެއްލުމަކާއި ކުރިމަތިލާން ޖެހުނު ތިން ސަބަބެއް ކަމުގައި ކުުންފުނިން ބަޔާންކުރީ:

1. ބިންވެރިޔާ ސްކީމަށް ހުޅުމާލެ ފޭސް 3 އިތުރުކުރެވުމާއިއެކު، ޔޮޓް މެރީނާގެ ސަރަހައްދުން ލިބޭނެ ފައިދާ އުނިކުރަން ޖެހުމުގެ ސަބަބުން

2. ހިޔާ އަދި އެހެނިހެން ސޯޝަލް ހައުސިންގ ކަސްޓަމަރުން ކުންފުންޏަށް ފައިސާ ނުދެއްކުމުގެ ސަބަބުން 

3. ބިންވެރިޔާ ސްކީމްގެ ދަށުން ދޫކުރެވުނު ބިންތަކަށް ހެދުނު އިމްޕެއަރމަންޓް ޕްރޮވިޝަންގެ ސަބަބުން

މީގެ އިތުރުންވެސް އެޗްޑީސީން ފާހަގަކުރި ގޮތުގައި، އިޖްތިމާޢީ ބޯހިޔާވަހިކަމުގެ ދަށުން ޖޫރިމަނާތައް މައާފުކުރުމުގެ ސަބަބުން އެ ކުންފުނީގެ އިދާރީ ހަރަދުތައް 344 މިލިއަން އިތުރުވުމާއި، ހިޔާ ޕްރޮޖެކްޓަކީ ގެއްލުންވާނެ ކޮންޓްރެކްޓެއްގެ ގޮތުގައި ބަލައިގަތުމުގެ ސަބަބުން ވެސް ގެއްލުންތަކެއް ލިބުނުކަމަށެވެ.