ދިވެހި އާބާދީއަށް ނިސްބަތްވާ ކޮންމެ ރައްޔިތަކީ ގައުމަށް އަގުހުރި ދަރިއެއް ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ. 

ރައީސް މުޢިއްޒު މިހެން ވިދާޅުވީ މިއަދު ފާހަގަކުރަމުންދާ ދުނިޔޭގެ އާބާދީ ދުވަހާ ގުޅިގެން އެކްސް ގައި ކުރެއްވި ޕޯސްޓެއްގައެވެ. 

އެގޮތުން އެމަނިކުފާނު ވިދާޅުވީ، ކޮންމެ ދިވެހި ރައްޔިތަކީވެސް މި ގައުމުގެ ކުރިމަގަށް ކުރާ އުއްމީދުގެ ބައިވެރިއެއް ކަމަށެވެ. 

Advertisement

ދުނިޔޭގެ އާބާދީ ދުވަހަކީ ކޮންމެ އަހަރެއްގެ ޖުލައި 11 ވަނަ ދުވަހު ފާހަގަކުރާ ދުވަހެކެވެ. މި ދުވަހަކީ އާބާދީއާ ގުޅުންހުރި މައްސަލަތަކަށް ސަމާލުކަން ގެނައުމަށް ބޭއްވޭ ދުވަހެކެވެ. އެގޮތުން، އިންސާނީ މުޖުތަމަޢެއްގައި އުފެދޭނެ އެންމެހައި މައްސަލަތަކާއި، އެ މައްސަލަތަކުން ނުކުންނަ ނަތީޖާތަކާއި، އެ މައްސަލަތައް ޙައްލުކުރުމަށް ކުރަންވީ ކަންކަމާމެދު، ރައްޔިތުންގެ މެދުގައި ހޭލުންތެރިކަން އިތުރުކުރުން ހިމެނެއެވެ.

ދުނިޔޭގެ އާބާދީ ދުވަސް މިއަދު ފާހަގަ ކުރާއިރު ރާއްޖޭގެ އާބާދީ އިތުރުވަމުންދާ ދިއުން މަޑުޖެހި، ކުރިއަށް އޮތް ބައިގަރުނުގެ ތެރޭގައި ރާއްޖޭގެ އާބާދީގެ ބޮޑުބައެއް މުސްކުޅިވާނެ ކަމަށް ތަފާސް ހިސާބުތަކުން ދައްކައެވެ.