ތިލަމާލެ ބްރިޖު މަޝްރޫޢުގެ މަސައްކަތް ހަލުވި ދުވެލީގައި ކުރިއަށްދާ ކަމަށް ސަރުކާރުން މިއަދު ހާމަކޮށްފިއެވެ.
އިމާރާތްކުރުމާއި ބިނާރާ ބެހޭ ވަޒީރު، އިބްރާހީމް ޠައާމު މުހައްމަދު މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ، ތިލަމާލެ ބްރިޖު މަޝްރޫޢުގެ ފުރަތަމަ ކަނޑުގެ ޕްރީކާސްޓް ޑެކް ސެގްމަންޓް މިއަދު ވިލިމާލެ ކައިރީގައި ވަނީ ފަށައިގަނެވިފައި ވާކަމަށެވެ.
އަދި، މިހާތަނަށް މަޝްރޫޢުގެ މަސައްކަތުގެ ޖުމްލަ 40.47 އިންސައްތަ ވަނީ ނިމިފައިކަމަށް ވަޒީރު ފާހަގަކުރެއްވިއެވެ. މިއީ 2023 ވަނަ އަހަރުގެ ނޮވެމްބަރު މަހު ގާތްގަނޑަކަށް 29 އިންސައްތައިގައި ހުރި މިންވަރާ އަޅާބަލާއިރު ފާހަގަކޮށްލެވޭ ކުރިއެރުމެކެވެ.
އިންޑިއާގެ އެފްކޮންސް އިންފްރާސްޓްރަކްޗަރ އިން ކުރިއަށް ގެންދާ މި މަޝްރޫޢަކީ 7 ބިލިއަން ރުފިޔާގެ ބޮޑު މަޝްރޫޢެކެވެ. މި މަޝްރޫއުގެ ދަށުން 6.7 ކިލޯމީޓަރުގެ ދިގު ބްރިޖަކާއި ކޯސްވޭ ލިންކެއް އަޅާނެއެވެ. އެގޮތުން ދެރަށް ދޭތެރޭ ކަނޑުގައި އަޅާ މައި ބްރިޖްތަކުގައި 140 މީޓަރު ހުންނާނެ ކަމަށް އެފްކޮންސް އިން ބުނެއެވެ.
Advertisement
This content is created and paid for by advertisers and does not involve Voice Journalists
