އެސްޓީއޯއިން ހުޅުމާލޭގައި އިމާރާތްކޮށްފައިވާ ފަސް ތަރީގެ ހޮޓާ ދޫކޮށްލުމަށް އެކުންފުނިން ނިންމައިފިއެވެ.
އެސްޓީއޯއިން މިފަދައިން ނިންމާފައިވާކަން ހާމަކޮށްފައިވަނީ ރޭގައި ބޭއްވި އެކުންފުނީގެ އަހަރީ އާއްމު ޖަލްސާގައެވެ.
އެގޮތުން މި ޖަލްސާގައި ކުންފުނީގެ މެނޭޖިން ޑިރެކްޓަރު (އެމްޑީ) ޝިމާދު އިބްރާހިމް ވިދާޅުވީ، އިތުރު އެސެޓްތައް ގަތުމާއިއެކު އެސްޓީއޯއާ ނުގުޅޭ ބައެއް ވިޔަފާރިތައް ދޫކޮށްލުމަކީ މުހިންމު ކަމެއް ކަމަށެވެ.
ހުޅުމާލޭގައި ހަދާފައިވާ ހޮޓެލުގެ މައްސަލައަށް އަދިވެސް ދާއިމީ ހައްލެއް ހޯދިފައި ނުވާ ކަމަށާއި، އެކަމުގެ އެންމެ ފަހުގެ މަޝްވަރާތައް އެޗްޑީސީއާއިއެކު ކުރަމުންގެންދާ ކަމަށް ވެސް ޝިމާދު ވިދާޅުވިއެވެ.
ހުޅުމާލޭ ފުރަތަމަ ފިޔަވަހީގައި އިމާރާތްކުރި މި ހޮޓެލަކީ ރެޑިސަން ބްލޫއާއެކު އެސް.ޓީ.އޯއިން ޤާއިމްކޮށްފައިވާ އެއްބަސްވުމެއްގެ ދަށުން ޑޮލަރުން ލިބޭ އާމްދަނީ އިތުރު ކުރުމުގެ އަމާޒުގައި، ޓޫރިޒަމް ދާއިރާއަށް ވަނުމަށްޓަކައި ތަރައްޤީކުރަމުންދިޔަ ހޮޓަލެކެވެ.
2006 ވަނަ އަހަރު ތެރޭގައި ތަރައްގީ ކުރުމަށް ނިންމި މިހޮޓަލް ހިންގަން ޝައުގުވެރިވާ ފަރާތެއް ހޯދުމަށް އެސްޓީއޯއިން މީގެ ކުރިން އިއުލާނުކުރިކަން ވެސް ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
