ރައީސް ޑރ.މުޙައްމަދު މުޢިއްޒު، އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް ދެމުނު ހަމަލާ ވަރަށް ހަރުކަށި އިބާރާތުން ކުށްވެރިކުރައްވައިފިއެވެ.

ރައީސް މުޢިއްޒު އެކްސް މެދުވެރިކޮށް ކުރެއްވި ޕޯސްޓެއްގައި ވިދާޅުވީ ސިޔާސީ މައިދާނުގައި އެއްވެސް ބާވަތެއްގެ އަނިޔާވެރިކަމަކަށް ޖާގައެއް ނޯންނާނެ ކަމަށާއި، ކޮންމެ ތަނެއްގައި ހިނގި ކަމުގައިވިޔަސް އަނިޔާވެރި ޢަމަލުތައް އެންމެ ހަރުކަށި އިބާރާތުން ކުށްވެރިކުރައްވާ ކަމަށެވެ.

މީގެ އިތުރުން ރައީސް މުޢިއްޒު ވިދާޅުވީ ކުރީގެ ރައީސް ޑޮނަލްޑް ޓްރަމްޕަށާއި، އޭނާގެ އާއިލާއަށާއި، އަދި މި ހަމަލާގައި އަނިޔާ ލިބުނު އެހެން ފަރާތްތަކަށް އެމަނިކުފާނުގެ ހެޔޮ އެދުންތަކާއި ދުޢާ އޮތް ކަމަށެވެ.

ޕެންސިލްވޭނިއާގެ ބަޓްލޭގައި ބޭއްވުނު ކެންޕެއިން ރެލީގެ ތެރެއިން، ޓްރަމްޕް ސްޓޭޖުގައި ޗާޓެއް ދައްކަމުންދަނިކޮށް އޭނާގެ ކަނާއަތު ކަންފަތަށް މީހަކުވަނީ ބަޑި ޖަހައިފައެވެ. އެއާއެކު، ސީކްރެޓް ސަރވިސްގެ އޭޖެންޓުން ސްޓޭޖަށް އަރައި، ސްޓޭޖުގެ ފަހަތަށް ޓްރަމްޕް ގެންދެވުފައިވާތަން ވީޑިއޯއިން ފެނުނެވެ. 

މިހާދިސާއަށްފަހު ޓްރަމްޕް ކެމްޕޭން އޮފީހުން ފަހުން ނެރުނު ބަޔާނެއްގައި ބުނެފައިވަނީ އޭނާ "ރަނގަޅު" ކަމަށެވެ. 

މީގެ އިތުރުން، ބަޑިޖެހި މީހަކާއި އެ ރެލީއަށް ދިޔަ މީހަކު މަރުވެފައިވާކަމަށް ބަޓްލަރ ކައުންޓީގެ ޑިސްޓްރިކްޓް އެޓަރނީ ބުނެފައިވާކަމަށް ރިޕޯޓްތައް ބުނެއެވެ. 

މި ހާދިސާއާއި ގުޅުގެން އެކިއެކި ސިޔާސީ ލީޑަރުން އަންނަނީ ޓްރަމްޕަށް ހިތްވަރުދީ މެސެޖުތައް ފޮނުވަމުންނެވެ.