ވިޔަފާރިތައް ކުރި އެރުވުމާއި ވިޔަފާރިތަކަށް ފަސޭހަކަމާއިއެކު ބޭންކިން މުއާމަލާތް ކުރުވޭނެ ގޮތްތަކުގެ މައުލޫމާތު ހިއްސާ ކުރުމަށް ހާއްސަ އޯޕަން ޑޭއެއް ބޭއްވުމަށް މޯލްޑިވްސް އިސްލާމިކް ބޭންކް (އެމްއައިބީ) އިން ނިންމައިފިއެވެ.
އެމްއައިބީ އިން ބުނީ މި ހާއްސަ އޯޕަންޑޭ ބޭއްވުމަށް ހަމަޖެހިފައިވަނީ މި ޖުލައި މަހުގެ 18 ވަނަ ދުވަހު 9:00 އިން 17:00 އަށް މީރުމާ އިމާރާތުގެ 2 ވަނަ ފަންގިފިލާގައިކަމަށެވެ.
މި އޯޕަންޑޭގެ ތެރެއިން ވިޔަފާރިތަކަށް އެބޭންކުންދޭ އެކި ހިދުމަތްތަކާއިބެހޭ މައުލޫމާތު ދެވިގެންދާއިރު، އޭގެތެރޭގައި އެ ވިޔަފާރިއަކާއި އެކަށޭނެ ފައިނޭންސިން ފެސިލިޓީއާއި ޒަމާނީ ވަސީލަތްތަކުގެ އެހީގައި ބޭންކިން ހިދުމަތް ހޯދުމަށް ހުރި ފުރުސަތުތަކާއި ބެހޭ މައުލޫމާތު ލިބޭނެކަމަށާއި އެމްއައިބީގައި އެކައުންޓު ހުޅުވަން ބޭނުންވާ ވިޔަފާރިތަކަށް އެކަމާއިބެހޭ މައުލޫމާތު ލިބޭނެކަމަށް އެމްއައިބީއިން ބުނެއެވެ.
މީގެ ކުރިންވެސް އެމްއައިބީއިން މިފަދަ ހަރަކާތްތައް ކާމިޔާބު ކަމާއިއެކު ކުރިއަށް ގެންގޮސްފައިވާއިރު، އެ ބޭންކުން ކުރިއަށްގެންދާ މިފަދަ ހަރަކާތްތަކަށް ބޮޑު ތަރުހީބެއް ލިބޭކަން ފާހަގަކޮށްލަން ޖެހެއެވެ.
Advertisement
This content is created and paid for by advertisers and does not involve Voice Journalists
