އޯޒެން ރިޒާވް ބޮލިފުށި ރިސޯޓްގެ ވެރިޔާ، މަރުޙޫމް ޙުސައިން ޝަރީފަކީ މިސްކިތް ބިނާކުރެއްވުމާއި ނިކަމެތިންނަށް އެހީތެރިވުން ފަދަ ކަންކަމުގައި އިޙްސާންތެރި ބޭފުޅެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވެފައިވަނީ ހުސައިން ޝަރީފް އަވަހާރަވުމާއި ގުޅިގެން އާއިލާއަށް ތައުޒިޔާ ދަންނަވައި، އެކްސްގައި ކުރެއްވި ޕޯސްޓެއްގައެވެ.
އެ ޕޯސްޓުގައި ރައީސް ވިދާޅުވެފައިވަނީ މަރުޙޫމް ޙުސައިން ޝަރީފަކީ ފަތުރުވެރިކަމާއި ވިޔަފާރީގެ ދާއިރާގައި ތަޖުރިބާކާރު ޤައުމީ ޚިދުމަތްތެރިއެއް ކަމަށެވެ.
މަރުޙޫމް ޙުސައިން ޝަރީފަކީ ފަތުރުވެރިކަމާއި ވިޔަފާރީގެ ދާއިރާގައި ތަޖްރިބާކާރު ޤައުމީ ޚިދުމަތްތެރިއެކެވެ. އަދި މިސްކިތް ބިނާކުރެއްވުމާ، ނިކަމެތީންނަށާއި ޖަމާޢަތްތަކަށް އެހީތެރިކަން ފޯރުކޮށްދެއްވުން ފަދަ ކަންކަމުގައި އިޙްސާންތެރި ބޭފުޅެކެވެ.
ރައީސް މުޢިއްޒު
ރައީސް މުޢިއްޒު ވަނީ މަރުޙޫމް ޙުސައިން ޝަރީފް އަވަހާރަވުމުގެ ހިތާމައިގައި ބައިވެރިވެ، އެ މަރުޙޫމްގެ ޢާއިލާއަށް ތަޢުޒިޔާ ދަންނަވާފައެވެ. އަދި އެ މަރުޙޫމްގެ ޢާއިލާއަށް ކެތްތެރިކަން މިންވަރުކޮށްދެއްވުން އެދި ދުޢާކުރައްވާފައިވެއެވެ.
މީގެ އިތުރުން ރައީސް މުޢިއްޒުގެ ޕޯސްޓުގައި ވަނީ މަރުޙޫމް ޙުސައިން ޝަރީފް ސުވަރުގޭގެ ދާއިމީ ނިޢުމަތުގައި، މާތްاللهގެ ތަނަވަސްވެގެންވާ ރަޙްމަތާއި ނިޢުމަތުގައި ލެހެއްޓެވުމަށް އެދި ދުޢާކުރައްވާފައެވެ.
މިއަދުގެ ވަގުތެއްގައި ޝަރީފް އަވަހާރަވެފައިވާރު، އޭނާގެ އުމުރަކީ 64 އަހަރެވެ.
މީޑިއާތަކުން ރިޕޯޓްކޮށްފައިވާގޮތުގައި ޝަރީފް އަވަހާރަވެފައި ވަނީ އައިޖީއެމްއެޗްގައި ފަރުވާ ދެމުން ދަނިކޮށެވެ.
އޭނާގެ ކަށުނަމާދު އޮންނާނީ މިރޭ އިޝާ ނަމާދަށް ފަހު މާލެ އިސްލާމީ މަރުކަޒުގައެވެ. އަދި މޫނު ދެއްކުން އިސްލާމީ މަރުކަޒުގައި ބާއްވާ ގޮތަށް ވަނީ ހަމަޖެހިފައެެވެ.
Advertisement
This content is created and paid for by advertisers and does not involve Voice Journalists
