ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް)ގެ މެންބަރުކަމަށް އިލެކްޝަންސް ކޮމިޝަން (އީސީ)ގެ ކުރީގެ ނައިބު ރައީސް އިސްމާއީލް ހަބީބް އައްޔަންކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޮނުއްވި ނަން އިއްވައިފިއެވެ.

އެޗްއާރްސީއެމްގެ މެންބަރެއްގެ ގޮތުގައި ހުންނެވި ޑރ. އަހުމަދު އަދުހަމް އަބްދުالله މިދިޔަ އަހަރުގެ އޮކްޓޫބަރު މަހުގެ ތެރޭގައި މަގާމުން އިސްތިއުފާ ދެއްވުމާ ގުޅިގެން، މަގާމަށް ކުރިމަތިލުމަށް ފުރުސަތު ހުޅުވާލީ މިދިޔަ ޖޫން މަހުގެ ތެރޭގައެވެ. 

އެގޮތުން ކުރިމަތިލީ މީހުންގެ ތެރެއިން، ހަބީބަށް ރުހުން ހޯއްދެވުމަށް ރައީސް ޑރ. މުހައްމަދު މުޢިއްޒު މަޖިލީހަށް ފޮނުވާފައިވާއިރު، އެމަނިކުފާނުގެ ސިޓީ މިއަދުގެ މަޖިލީހުގެ ޖަލްސާގައި ވަނީ އިއްވާފައެވެ.

Advertisement

އެއަށްފަހު، އިތުރަށް ދިރާސާކުރުމަށް ހިއުމަން ރައިޓްސް އެންޑް ޖެންޑާ ކޮމިޓީއަށް އެ މައްސަލަ ވަނީ ފޮނުއްވާފައެވެ.

އީސީގެ މެންބަރު ކަމަށް ހަބީބު އެންމެ ފުރަތަމަ އައްޔަންކޮށްފައި ވަނީ 13 މާޗު 2014ގައެވެ. އޭގެ ފަހުން ދެވަނަ ފަހަރަށް ކޮމިޝަންގެ މެންބަރު ކަމަށް ހަބީބު އައްޔަންކޮށްފައި ވަނީ 13 މާޗު 2019ގައެވެ. އެ ދައުރު ހަމަވީ މިދިޔަ މާޗު މަހުގެ 13 ވަނަ ދުވަހަށެވެ.

އީސީގެ ނައިބު ރައީސްކަމުގައި ހަބީބް އެ ކޮމިޝަންގެ މެންބަރުކަން ކުރައްވާފައިވަނީ ދެ ދައުރެއްގައެވެ. އެހެންވެ، ގާނޫނު ބުނާ ގޮތަށް އޭނާއަށް އިތުރު ދައުރެއް އަދައެއް ނުކުރެއްވެއެވެ.

އެޗްއާރުސީއެމްގެ މެމްބަރުންގެ ގޮތުގައި މިހާރު ތިއްބަވަނީ:

ކޮމިޝަންގެ ރައީސް މަރިޔަމް މުނާ

 މުއުމިނާ ވަހީދު

އާމިނަތު ޝިފާއަތު އަބްދުއްރައްޒާގު

ސަމާއު އަހްމަދު ނަޖީބު