ހުޅުމާލޭގައި އާންމުން ދިރިއުޅޭ ސަރަހައްދުތަކުގައި ސިނާއީ މަސައްކަތް ނުކުރުމަށާއި، ހުޅުމާލެއިން ދޫކޮށްފައިވާ އެއްވެސް ބިމެއްގައި ހުއްދަ ނުނަގާ އިމާރާތް ކުރުމުގެ މަސައްކަތްތައް ނުކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިލްތިމާސްކޮށްފި އެވެ.

މިއަދު އެޗްޑީސީ އިން ނެރުނު ނޫސް ބަޔާނެއްގައި ބުނެފައިވަނީ ހުޅުމާލޭގެ އެކި ސަރަހައްދުތަކުގައި ގިނަ އަދަދެއްގެ މަޝްރޫއުތައް އެއްފަހަރާ ކުރިއަށްގެންދިއުމާ ގުޅިގެން ގިނަ އަދަދެއްގެ ބާދަގަނޑު ފަދަ ތަކެތި އުފެދި، އެތަކެތި ވިއްކާ ވިޔަފާރި ކުރާ ފަރާތްތައް އާންމުވެފައިވާކަން ފާހަގަކުރެވިފައި ވާ ކަމަށެވެ.

އަދި، އެގޮތަށް ވިޔަފާރިކުރަމުންދާ ބައެއް ފަރާތްތަކުން އާންމު ދިރިއުޅުމަށް ދޫކޮށްފައިވާ ގޯތިތަކާއި، މަގާއި، ދުވާރު ފަދަ ތަންތަން ހުއްދަ ނެތި ބޭނުންކުރަމުންދާތީ، އެކަމުގެ ސަބަބުން ހުޅުމާލޭގައި ދިރިއުޅޭ ރައްޔިތުންނަށް އުނދަގޫތަކާ ކުރިމަތިވަމުންދާ ކަމުގެ ޝަކުވާ އެ ކޯޕަރޭޝަނަށް ލިބެމުން ދާ ކަމަށާއި، އެހެންކަމުން، އުސޫލުތަކާ ހިލާފަށް އެފަދަ މަސައްކަތެއް ގޯތި ތެރޭގައާއި އާންމުން ދިރިއުޅޭ އެއްވެސް ސަރަހައްދެއްގައި ނުކުރުމަށް އިލްތިމާސް ކުރާ ކަމަށްވެސް އެޗްޑީސީގެ ބަޔާނުގައި ވެއެވެ.

އޭގެ އިތުރުން، މިހާރަކަށް އައިސް ހުޅުމާލެއިން ދޫކޮށްފައިވާ ގޯތިތަކުގައި އިމާރާތް ކުރާއިރު އެޗްޑީސީ އިން ހަދާފައިވާ ގަވާއިދުތަކާއި އުސޫލުތަކަށް ބެލުމެއްނެތި ގޯތިތެރޭގެ މަސައްކަތް ކުރުމާއި އިމާރާތް ކުރުމުގެ މަސައްކަތް ކުރާކަން ކޯޕަރޭޝަންގެ ސަމާލުކަމަށް އައިސްފައިވާ ކަމަށާއި، އެކަންކަމުގެ ޝަކުވާ އެ ކޯޕަރޭޝަނަށް ލިބެމުންދާތީ، ހުޅުމާލެއިން ދޫކޮށްފައިވާ ގޯއްޗެއްގައި އިމާރާތް ހަދަން ފެށުމުގެ ކުރިން ނަގަންޖެހޭ ހުރިހާ ހުއްދަތައް ނެގުމަށް މީގެ ކުރިންވެސް އިލްތިމާސް ކޮށްފައިވާކަން އެޗްޑީސީން ފާހަގަ ކުރިއެވެ.

އެޗްޑީސީން ބުނެފައިވަނީ އެ ކޯޕަރޭޝަނުން އަބަދުވެސް މަސައްކަތް ކުރަނީ ހުޅުމާލޭގައި ދިރިއުޅޭ ހުރިހާ ރައްޔިތުންގެ ދިރިއުޅުމުގެ ފެންވަރު ރަނގަޅުކޮށް، ހުރިހާ ފަރުދުންގެ ލާބައާއި މަންފާއަށް ކަމަށެވެ.