ފުލުހުން ހައްޔަރުކުރަން އުޅުނު މީހަކު ފިލަން އުޅުމުގެ ތެރޭގައި އަނިޔާވެ، މިހާރު ދަނީ އައިޖީއެމްއެޗް ހޮސްޕިޓަލުގެ އިންޓެންސިވް ކެއަރ ޔުނިޓުގައި ފަރުވާ ދެމުންނެވެ. 

ފުލުހުން ނެރުނު ނޫސްބަޔާނެއްގައި ބުނެފައިވާ ގޮތުގައި، ކ. މާލެ މ. ދޯޅަބުގެ، މުޙައްމަދު އަޒްމީލް ޖަލީލު (38އ) ބަންދުގައި ބަހައްޓައިގެން 16 ޖުލައި 2024 ވަނަ ދުވަހުގެ 01:00 އަށް ޑްރަގް ކޯޓަށް ހާޒިރުކުރުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން އޭނާ ހައްޔަރުކުރަން ފުލުހުން ދިޔުމުން، ފިލަން އުޅުމުގެ ތެރޭގައި އޭނާއަށް އަނިޔާވެފައިވެއެވެ.

މި ހާދިސާ ހިނގާފައިވަނީ 15 ޖުލައި 2024 ވަނަ ދުވަހުގެ 14:15 އެހައިކަށްހާއިރު، ފުލުހުން އޭނާ ދިރިއުޅޭ ގެއަށް ދިޔުމުންނެވެ. އޭނާ ތައްޔާރުވެގެން އައުމަށް ވަގުތުކޮޅެއް ދޭން ބުނުމަށްފަހު، އެގޭގެ ފުރަތަމަ ފަންގިފިލާގެ ކުޑަދޮރުން ނުކުމެ ފިލަން އުޅުމުގެ ތެރޭގައި މަގުމައްޗަށް ވެއްޓި، ބޯ ފަޅައިގެންގޮސް އިތުރު އަނިޔާތަކެއް ވެފައިވެއެވެ.

Advertisement

މުޙައްމަދު އަޒްމީލް ޖަލީލު އައިޖީއެމްއެޗް ހޮސްޕިޓަލަށް ގެންގޮސްފައިވަނީ ދިވެހި ފުލުހުންގެ ޚިދުމަތުގެ މާލޭ ކަސްޓޯޑިއަލްއަށް ގެންގޮސް، ކަސްޓޯޑިއަލް މެޑިކަލް އޮފިސަރު ބެލުމަށްފަހު 15 ޖުލައި 2024 ވަނަ ދުވަހުގެ 15:05 ހާއިރުއެވެ. މިހާރު އޭނާއަށް ފަރުވާދެމުންދަނީ އައިޖީއެމްއެޗް ހޮސްޕިޓަލުގެ އިންޓެންސިވް ކެއަރ ޔުނިޓުގައި ވެންޓިލޭޓަރުގައެވެ.

މި ހާދިސާއާ ގުޅިގެން، މުޙައްމަދު އަޒްމީލް ޖަލީލު ހައްޔަރުކުރުމުގައި ފުލުހުން ޢަމަލުކޮށްފައިވާ ގޮތާމެދު އާއިލާގެ ކަންބޮޑުވުންތަކެއް ހުރުމާއެކު، ހައްޔަރުކުރުމުގައި ޢަމަލުކޮށްފައިވާ ގޮތް ބެލުމަށް ފުލުހުންގެ ޕްރޮފެޝަނަލް ސްޓެންޑަރޑްސް ކޮމާންޑް، ނެޝަނަލް އިންޓެގްރިޓީ ކޮމިޝަނާއި ހިއުމަން ރައިޓްސް ކޮމިޝަންގައި ދިވެހި ފުލުހުންގެ ޚިދުމަތުގެ ފަރާތުން ވަނީ އެދިފައެވެ.