އޭޑީކޭގައި މަސައްކަތް ކުރައްވަމުންދިޔަ، ރާއްޖޭގެ ފުރަތަމަ ނިޔުރޯސާޖަން ޑރ. އަލީ ނިޔާފް އެ ހޮސްޕިޓަލުން ވަކިވެވަޑައިގެންފި އެވެ.

މިކަން ހާމަކޮށް، އޭޑީކޭ ހޮސްޕިޓަލުން 'އެކްސް'ގައި މިއަދު ކުރި ޕޯސްޓެއްގައި ވަނީ، ފާއިތުވެދިޔަ 9 އަހަރާއި 10 މަސްދުވަހު، ޑރ. ޢަލީ ނިޔާފު އެ ހޮސްޕިޓަލަށް ކޮށްދެއްވި ހިދުމަތްތަކަށް ޝުކުރު އަދާކޮށްފައެވެ.

އަދި އެ ހޮސްޕިޓަލުގެ ނިޔުރޯ ސާޖަރީ ޑިޕާޓުމެންޓްގެ ކުރިއެރުމުގައި ޑރ. ނިޔާފުގެ މިންނެތް މަސައްކަތް ފާހަގަކޮށް އޭޑީކޭ އިން ވަނީ، އެ ހޮސްޕިޓަލަށާއި އެ ހޮސްޕިޓަލުގެ ނިޔުރޯސާޖަރީ ޑިޕާޓުމެންޓުގައި ނިޔާފަށް ޚާއްސަ މަގާމެއް ވާނެ ކަމަށާ، އޭނާ އަކީ އެތަނުގެ އަގުހުރި، ޑޮކްޓަރެއް ކަމަށް ބުނެފައެވެ. 

"ކާމިޔާބު ކުރިމަގަކަށް އެދެމެވެ،" އޭޑީކޭގެ މެނޭޖުމެންޓާއި މުވައްޒަފުންގެ ފަރާތުން ނިޔާފަށް ޝުކުރު އަދާކޮށް، ކޮށްފައިވާ ޕޯސްޓުގައިވެ އެވެ.

ނިޔާފު އޭޑީކޭ އިން ވަކިވެވަޑައިގެންފައިވަނީ އައިޖީއެމްއެޗުގައި މަސައްކަތް ކުރެއްވުމަށެވެ. 

ނިޔާފް އޭޑީކޭއިން ވަކިވެ، އައިޖީއެމްއެޗާއި ގުޅެން ނިންމުމާއި ގުޅިގެން އޭނާގެ ބޭބެ، އަދި އޭޑީކޭގެ ކުޑަކުދިންގެ ޑޮކްޓަރު، ޑރ. އަބްދުالله ނިޔާފު ވަނީ ނިޔުރޯސާޖަން ނިޔާފާ އެކު އައިޖީއެމްއެޗުގެ ނިޔުރޯސާޖަރީ ޑިޕާޓުމެންޓަށް ކުރިއެރުން އަންނާނެ ކަމަށް އުއްމީދު ކުރައްވާ ކަމަށް ވިދާޅުވެފައެވެ.

ޑރ. ނިޔާފް އަކީ ރާއްޖޭގެ ފުރަތަމަ ނިޔުރޯސާޖަން އެވެ. އޭނާ ވަނީ އެމެރިކާ، ރަޝިއާ، އިންޑިއާ، ބްރެޒިލް، ނޭޕާލް އަދި އެހެން ގިނަ ގައުމުތަކަކުން ވެސް ތައުލީމާއި ތަމުރީނު ހާސިލުކުރައްވައިފައެވެ. އަދި، 2،000 އަށްވުރެ ގިނަ ނިއުރޯސާޖަރީ ކާމިޔާބުކަމާ އެކު ފުރިހަމަކުރައްވާފައިވެއެވެ.

ޑރ. ނިޔާފް މާލޭގައި ހުންނަ ނިޔުރޯ އެންޑޯކްރައިން މެޑިކަލް ފެސިލިޓީގައި މިއަދުން ފެށިގެން ބައްލަވާނެކަމަށް އެ ކްލިނިކުން ބުނެއެވެ.