ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބުގެ އިތުބާރު ނެތް މައްސަލަ މަޖިލިސް މަރުހަލާގެ ތެރެއިން ތަޙްޤީގުކުރާ ޤަވާއިދަށް ބަދަލު ގެނެސްފިއެވެ.

މި ޤަވާއިދަށް ބަދަލު ގެނެސްފައިވަނީ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ ބެލުމުގައި، މަޖިލީހުގެ މަރުހަލާގައި އަވަސް އަރުވާލެވޭ ގޮތަށް މިދިޔަ 19 ވަނަ މަޖިލީހުން ފާސްކޮށްފައިވާ ބަޔަށެވެ. އެއީ މަޖިލިސް ގަވާއިދުގެ 224 ވަނަ މާއްދާގައި ހިމެނޭ ބައިތަކެކެވެ.

މިއަދު 20 ވަނަ މަޖިލީހުން ފާސްކޮށް ޢަމަލު ކުރަން ފެށި ޤަވާއިދުގައި ވަނީ، ރައީސް އަދި ނައިބު ރައީސް މަގާމުން ވަކިކުރަން ހުށަހަޅާ މައްސަލައެއް ތަހުގީގު ކުރުމަށް އެކުލަވާލާ ހަތް މެންބަރުންގެ ކޮމިޓީއަށް މައްސަލަ ހުށަހެޅުމުން ގިނަވެގެން 10 ދުވަސް ތެރޭގައި ތަހުގީގު ނިންމަންވާނެ ކަމަށެވެ. މިދިޔަ 19 ވަނަ މަޖިލީހުގައި މި ޤަވާއިދު އޮތީ ގިނަވެގެން ފަސް ދުވަހުގެ ތެރޭގައި ތަހުގީގު ނިންމައި ރިޕޯޓު މަޖިލިސް ތަޅުމަށް ހުށަހެޅުމަށެވެ.

މިއަދު އަލަށް ފާސްކުރި ޤަވާއިދުގައި ވާގޮތުން، ކޮމިޓީއަށް މައްސަލަ ހުށަހެޅުމުން ކޮމިޓީގެ ފުރަތަމަ ބައްދަލުވުން ބާއްވަން ޖެހެނީ މަދުވެގެން 24 ގަޑިއިރުގެ ނޯޓިސް މެންބަރުންނަށް ދިނުމަށް ފަހުގައެވެ. 19 ވަނަ މަޖިލީހުގައި މި ޤަވާއިދު އޮތީ މަދުވެގެން ހަ ގަޑިއިރުގެ ނޯޓިސްއެއް ދޭން ޖެހޭ ގޮތަށެވެ. މީގެ އިތުރުން މައްސަލަ ތަޙްޤީގުކުރުމަށް ކޮމިޓީއަށް އެއްވެސް މީހަކު ހާޒިރު ކުރާ ނަމަ، މަދުވެގެން ދެ ގަޑިއިރުގެ ނޯޓިސް އެއް ދިނުމަށް ކުރިން އޮތް ޤަވާއިދު ވަނީ މަދުވެގެން ފަސް ދުވަހުގެ ނޯޓިސްއެއް ދޭން ޖެހޭގޮތަށް ބަދަލު ގެނަސްފައެވެ. 

މީގެ އިތުރުން ތަހުގީގު ކޮމިޓީގެ ރިޕޯޓު ރައީސް އާއި ނައިބު ރައީސަށް ފޮނުވާ ތާރީހުން ފެށިގެން ގިނަވެގެން ދެ ދުވަސް ތެރޭ ލިޔުމުން ޖަވާބުދާރީ ވާން ޖެހޭގޮތަށް އޮތް ޤަވާއިދު ވަނީ ހަތް ދުވަސް ތެރޭގައި ލިޔުމުން ޖަވާބުދާރީވާން ޖެހޭ ގޮތަށް ބަދަލުކޮށްފައެވެ.

މަޖިލީހުގެ ގަވާއިދު ނިންމައި އާއްމު ކޮމިޓީން ފޮނުވި ރިޕޯޓުގައި މި ބަދަލުތަކާ ގުޅިގެން ބުނެފައި ވަނީ، އެކަންތައްތަައް ބަދަލުކުރީ، ކުރިން ގަވައިދުގައި ކަނޑައަޅާފައިވާ ވަގުތުތަކާއި މުއްދަތުތަކަކީ އެކަށީގެންވާ މުއްދަތުތަކެއް ކަމަށް ކޮމިޓީގެ މެންބަރުންނަށް ގަބޫލު ނުކުރެވޭތީ ކަމަށެވެ.