އެމްޖީ ސްޕޯޓްސް ކުލަބުގެ ފަރާތުން އިންތިޒާމްކޮށްގެން ކ.ކާށިދޫގައި ކުރިއަށް ގެންދާ އަންހެން ހޭންޑްބޯލް ޓްރެއިނިންގ ޕްރޮގްރާމުގައި ބައިވެރިވުމުގެ ފުރުސަތު އެކުލަބުން އަލުން ހުޅުވާލައިފި އެވެ.

އެމްޖީ ސްޕޯޓްސް ކުލަބުގެ ފަރާތުން އޮފިޝަލަކު ވޮއިސް ސްޕޯޓްސްއަށް މައުލޫމާތު ދިންގޮތުގައި ހޭންޑްބޯލް ޓްރެއިނިންގ ޕްރޮގްރާމުގައި ބައިވެރިވުމުގެ ފުރުސަތު އަލުން ހުޅުވާލީ ގިނަ ބެލެނިވެރިންތަކެއް އެކަމަށް އެދެމުންދާތީއެވެ. 

މީހަރުވެސް އެމްޖީ ސްޕޯޓްސް އެކަޑަމީގެ ހޭންޑްބޯޅަ ޕްރޮގުރާމުގައި 43 ކުއްޖަކު ތަމްރީނު ހަދަމުންދާއިރު، މި ޕްރޮގުރާމް ކުރިއަށްދަނީ  ދެ ކެޓަގަރީއަކަށް ބަހާލައިގެންނެވެ. އޭގެތެރެއިން ފުރަތަމަ ކެޓަގަރީގައި ގުރޭޑް އެކަކުން ފެށިގެން ފަހަކާއި ދެމެދުގެ 23 ކުދިން ހިމެނޭއިރު، ދެވަނަ ކެޓަގަރީގައި ހިމެނެނީ ގުރޭޑް ހަޔަކުން ފެށިގެން ދިހައަކާއި ދެމެދުގެ 20 ކުދިންނެވެ.

ވީމާ މި ޕްރޮގްރާމްގައި ދަރިވަރުން ބައިވެރިކުރުމަށް ޝައުގުވެރިވެލައްވާ ބެލެނިވެރިން " އެމްޖީ ސްޕޯޓްސް ކްލަބުގެ އެކަޑަމީގައި ރަޖިސްޓަރީ ވުމަށް އެދޭ ފޯމު" ފުރިހަމަ ކުރެއްވުމަށްފަހު 31 ޖުލައި 2024 ވާ ބުދަދުވަހުގެ 18:00 ގެ ކުރިން އެކުލަބަށް ހުށަހެޅުއްވުމަށް ވަނީ އެދިފައެވެ.

މިޕްރޮގްރާމްގައި ބައިވެރިވުމަށް އެދޭ ފޯމު ނެގުމާއި ހުށަހެޅުއްވުމުގެ ކަންކަން ކުރިއަށް ގެންދެވުމަށް ކުލަބުގެ އިވެންޓް ކޯޑިނޭޓަރު އައިމަން މުހައްމަދު ( ފޯން ނަންބަރު : 7864088 / 9391646 ) އާއި ގުޅުއްވައިގެން ކުރިއަށް ގެންދިއުމަށް ކުލަބުން އެދިފައި ވެއެވެ. 

މީގެ އިތުރުން އޮންލައިންކޮށް ފޯމު ހުށަހެޅުއްވުމަށް ބޭނުންފުޅުވާ ފަރާތްތަކަށް ކުލަބުގެ ރަސްމީ ފޭސްބުކު ޕޭޖުން އަދި އިންސްޓަގްރާމް އެކައުންޓުން ފޯމުގެ ލިންކް ލިބިވަޑައިގަންނަވާނެއެވެ.