ރާއްޖޭގެ ފުރަތަމަ ޑިވެލޮޕްމަންޓް ބޭންކް، ޑިވެލޮޕްމެންޓް ބޭންކް އޮފް މޯލްޑިވްސް އުފެއްދުމަށްޓަކައި ލައިސަންސް ހޯދުމަށް އެދި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އަށް ހުށަހަޅައިފިއެވެ.
މިކަން ހާމަކޮށްފައިމިވަނީ އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު އެކްސްގައި ކުރެއްވި ޕޯސްޓެއްގައެވެ.
ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ރާއްޖޭގެ ޑިވެލޮޕްމެންޓް ބޭންކު އުފައްދާވާފައި ވަނީ މޭމަހުގެ 16 ވަނަ ދުވަހުއެވެ.
މީގެ އިތުރުންވެސް ވަޒީރު ސައީދު ދައުލަތުގެ މީޑިއާ، ޕީއެސްއެމް ނިއުސް ގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ، މޯލްޑިވްސް ޑިވެލޮޕްމަންޓް ބޭންކްގެ ހުރިހާ ދިރާސާއެއް ހެދުމުގެ އިތުރުން ބޭންކް އުފައްދަން ބޭނުންވާ ކުންފުނި ރަޖިސްޓްރީކޮށް ނިމިފައިވާކަމަށާއި، ބޭންކްގެ ބޯޑަށް ރާއްޖެއިން ބޭރުގެ ފަންނީ ބޮޑެތި ބޭންކްތައް ހިންގާފައި ތިއްބެވި ބޭފުޅުންގެ ތެރެއިން 2 ބޭފުޅުން މިހާރު ނަގާފައިވާކަމަށެވެ.
ހަމައެއާއިއެކު، މި ބޭންކް ހިންގާނެ އިމާރާތެއް ހަމަޖެއްސުމުގެ މަސައްކަރް ވެސް ކުރަމުންދާ ކަމަށާއި، މިހުރިހާ ކަމެއް މި ހިނގާ ޖުލައި މަސް ނިމުމުގެ ކުރިން ނިންމައި، އަންނަ މަހުގެ ތެރޭގައި މި ބޭންކް ހުޅުވޭނެކަމަށް ލަފާ ކުރައްވާ ކަމަށް ވެސް ވަޒީރު ސައީދު ވިދާޅުވިއެވެ.
"ބޭންކް ހިންގާނެ އިމާރާތެއްގެ ކަންތައްތަކުގައި އަދި އިމާރާތް ތައްޔާރުކުރުމުގެ މަސައްކަތްވެސް މިދަނީ ކުރަމުން. އަޅުގަނޑުމެން ކުރިން ލަފާކުރީ ޖުލައިމަސް ތެރޭގައި މި ހުރިހައި ކަމެއް އަޅުގަނޑުމެންނަށް ނިންމޭނެކަމަށް. ނަމަވެސް އިރާދަކުރެއްވިއްޔާ ކުރިއަށްއޮތް މަދު ހަފްތާތަކެއްގެ ތެރޭގައި، އަޅުގަނޑުމެން މިހާރު ލަފާމިކުރެވެނީ އަންނަ މަހު އިރާދަކުރެއްވިއްޔާ މި ބޭންކް ވުޖޫދުކުރެވޭނެ."
ވަޒީރު ސައީދު ވިދާޅުވިއެވެ.
ވަޒީރު ސައީދު އިިތުރަށް ވިދާޅުވީ، ޑިވެލޮޕްމެންޓް ބޭންކަށް ހޯދަނީ ބޭރުގެ ސީއީއޯއެއްކަމަށާއި، އެކަމަށްޓަކައި، ބައިނަލްއަޤްވާމީ ނޫހެއްގައި އިއުލާނުކުރާނެ ކަމަށެވެ.
Advertisement
This content is created and paid for by advertisers and does not involve Voice Journalists
