ރާއްޖޭގެ ނަންހުރި ވިޔަފާރިވެރިއެއް ކަމުގައިވާ އަތަމާ ޢަބްދުއްލަޠީފް އަވަހާރަވުމާ ގުޅިގެން ރައީސް ޑރ. މުޙައްމަދު މުޢިއްޒު އެ މަރުޙޫމާގެ ޢާއިލާއަށް ތައުޒިޔާ ފޮނުއްވައިފިއެވެ.
ލަތީފް ނިޔާވީ މިއަދު އޭޑީކޭ ހޮސްޕިޓަލްގަ އެވެ. ނިޔާވީއިރު އުމުރަކީ 96 އަހަރެވެ.
އަތަމާ އަބްދުލް ލަތީފް އަވަހާރަވުމާއި ގުޅިގެން ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، މަރުޙޫމް އަތަމާ ޢަބްދުއްލަޠީފަކީ ރާއްޖޭގައި ވިޔަފާރި ކުރިއެރުވުމަށް ދިގު މުއްދަތެއްގައި ގިނަ މަސައްކަތްތަކެއް ކޮށްދެއްވާފައިވާ ބޭފުޅެއް ކަމަށެވެ.
ރާއްޖޭގައި ވިޔަފާރި ކުރިއެރުވުމަށް ދިގު މުއްދަތެއްގައި ގިނަ މަސައްކަތްތަކެއް ކޮށްދެއްވާފައިވާ، އަދި ޖަމާޢަތަށް ފައިދާހުރި އެތައް ޚިދުމަތަކާ، މިސްކިތް ބިނާކުރެއްވުމާ، ގިނަ ޢަދަދެއްގެ ދިވެހީން ޙައްޖަށް ގެންގޮސްދެއްވުން ފަދަ ދަރުމަވެތި އެތައް ކަމެއް ޤައުމަށްކޮށްދެއްވައި، މުޖްތަމަޢުގެ އިޙްތިރާމް ހޯއްދަވާފައިވާ، ޢަބްދުއްލަޠީފް ޙުސައިން މަނިކު (އަތަމާ ޢަބްދުއްލަޠީފް) އަވަހާރަވީ ޚަބަރު އަޅުގަނޑު އަޑުއެހީ ފުން ހިތާމައާއެކުއެވެ.
ރައީސް ޑރ މުހައްމަދު މުޢިއްޒު
ރައީސް އިތުރަށް ވިދާޅުވި ގޮތުގައި މަރުޙޫމް ޢަބްދުއްލަޠީފަކީ ދިވެހި ވިޔަފާރިވެރީންގެ އިސް ސަފުގައި ޙަރަކާތްތެރިވެ ވަޑައިގެންނެވި އަދި ދިވެހީންނަށް އަމިއްލައަށް އެތައް ކަމެއް ކުރެވޭނެކަން ހިތްވަރާއި ޢަޒުމާއެކު ސާބިތުކޮށްދެއްވި ބޭފުޅެކެވެ. އަދި ޒަމާނާ ގުޅޭ އެތައް ހެޔޮ ބަދަލެއް ދިވެހި އިޤްތިޞާދަށް ގެނަސްދެއްވުމުގެ މުހިންމު ޙިއްސާދާރެކެވެ.
ރައްޔިތުންގެ ލާބަޔާއި މަންފާއަށް ހޭދަކުރެއްވުމުގައި އަދި ދީނީ ކަންކަން ކުރިއެރުވުމުގައި އިސްނެންގެވި މަދަދުގާރެއްގެ ގޮތުގައި ރައީސް މުޢިއްޒު ވަނީ މަރުޙޫމް ޢަބްދުއްލަޠީފް ސިފަކުރައްވާފައެވެ. އަދި ޖަމާޢަތަށް ފައިދާހުރި ޚާއްޞަ މަސައްކަތްތައް ކޮށްދެއްވުމުގެ ރޮނގުން 1991 ވަނަ އަހަރު ޤައުމީ އިނާމް ޙާޞިލްކުރައްވާފައިވާ ބޭފުޅެއްކަންވެސް ފާހަގަކުރައްވާފައިވެއެވެ.
މިއާއެކު ރައީސް މުޢިއްޒު ވިދާޅުވީ، ގެއްލިގެން އެދިޔައީ ޤައުމަށް ބޮޑެތި މަސައްކަތްތަކެއްކޮށްދެއްވި އަގުހުރި، ތަޖްރިބާކާރު، ނަމޫނާ ޝަޚްޞިއްޔަތެއް ކަމަށެވެ.
“މުޅި ޤައުމަށް ކުރިމަތިވީ ހިތާމައިގެ މި ދަނޑިވަޅު މަރުޙޫމްގެ ލޮބުވެތި ޢާއިލާއަށް ކެތްތެެރިކަން ދެއްވުން އެދި ދުޢާކުރަމެވެ. ސުވަރުގޭގެ ދާއިމީ ނިޢުމަތުގައި، މާތްاللهގެ ރުހިވޮޑިގަތުމާ، މަޣްފިރަތާ، ރަޙްމަތުގައި މަރުޙޫމް ޢަބްދުއްލަޠީފް ޙުސައިންމަނިކު ލަހައްޓަވާށިއެވެ. އާމީން”
"ޤައުމަކަށް ކުޅަ ޚިދުމަތެއް،
މީހާގެ ނަން މަތިވެރިވެދާށި،
އައުކަމާ ތާޒާކަމާ،
ފެހިކަން ނަމަށް ދާއިމްވެދާށި." ރައީސް މުޢިއްޒުގެ ޕޯސްޓް ނިންމަވާލައްވަމުން ލިޔުއްވާފައި ވެއެވެ.
Advertisement
This content is created and paid for by advertisers and does not involve Voice Journalists
