ހުޅުމާލޭގެ އެކި ސަރަޙައްދުތަކުގެ ދުވާރުމައްޗާއި، ހެޖުތެރޭގައި ބަހައްޓާފައިވާ ގޮނޑިމޭޒު ނަގަން އަނެއްކާވެސް އެޗްޑީސީން އަންގައިފިއެވެ.

ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އިން މިއަދު ކުރި އިއުލާނެއްގައި ބުނީ އެކޯޕަރޭޝަނުން 2023 ނޮވެމްބަރ 15 ގައި ކުރި އިއުލާނާއި 2024 ޖުލައި 23 ގައި ކުރި އިއުލާންގައި ދުވާރު މައްޗާއި ހެޖުތެރޭގައި ބަހައްޓާފައިވާ ގޮނޑިމޭޒު ނެގުމަށް ދެންނެވިފައިވީ ނަމަވެސް، ގިނަފަރާތްތަކަކުން އެކަމަށް އިޖާބަދީފައި ނުވާކަމަށެވެ. އަދި ދުވާރުމައްޗާއި، ހެޖުތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުޞޫލުން ޚިދުމަތްދިނުމަކީ މަނާކަމެއް ކަމުގައެވެ.

އެހެންކަމުން ހެޖުތެރޭގައި ބަހައްޓާފައިވާ ގޮނޑި، މޭޒު މިހިނގާ އޯގަސްޓް މަހުގެ 10 ވާ ހޮނިހިރު ދުވަހުގެ ކުރިންނެގުމަށް އެޗްޑީސީން ވަނީ އެ އިއުލާންގައި ވަނީ ހަނދާންކޮށްދީފައެވެ.

އެޗްޑީސީގެ އިއުލާންގައި އިތުރަށްބުނީ ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑިއާއި މޭޒު އެ އިއުލާންގައި ދެންނެވިފައިވާ ސުންގަނޑިއަށް ނުނަގާނަމަ އެތަކެތި ނަގައި އެސަރަހައްދުތައް ސާފުކުރުމުގެ މަސައްކަތް ކަމާ ގުޅުންހުރި އިދާރާތަކާ ގުޅިގެން އެ ކޯޕަރޭޝަނުން ކުރިއަށް ގެންދާނެކަމަށެވެ.

އަދި އެމަސައްކަތުގެ ތެރޭގައި މުދަލަށް ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެކަމަށް ވެސް އެއިއުލާންގައި ބުނެފައިވެއެވެ.