އެމެރިކާ ސަރުކާރުން ރާއްޖެއަށް އެހީގެ ގޮތުގައި އިތުރު 8.5 މިލިއަން ޑޮލަރު ދޭން ނިންމައިފިއެވެ.

ޚާރިޖީ ވުޒާރާއިން ނެރުނު ބަޔާނެއްގައި ބުނީ،  ޑިވެލޮޕްމަންޓް އޮބްޖެކްޓިވް ގްރާންޓް އެގްރީމަންޓް (ޑީއޯއޭޖީ) އަށް ގެނައި 14 ވަނަ އިސްލާހުގައި ރާއްޖެ އާއި އެމެރިކާ އާ ދެމެދު، މިއަދު ސޮއިކޮށްފައިވާ ކަމަށެވެ.

އެ ވުޒާރާގައި ބޭއްވި ސޮއިކުރުމުގެ ރަސްމިއްޔާތުގައި، މި އިސްލާހުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ސްޓޭޓް ފޮރ ފޮރިން އެފެއާޒް ޝެރީނާ އަބްދުއްސަމަދު އެވެ. އަދި އެމެރިކާ ސަރުކާރުގެ ފަރާތުން މި އިސްލާހުގައި ސޮއިކުރެއްވީ ޔޫ.އެސް.އޭ.އައި.ޑީ. ގެ މިޝަން ޑިރެކްޓަރ ގެބްރިއަލް ގްރައު އެވެ.

މިކަމާއި ގުޅޭ ގޮތުން ޚާރިޖީ ވުޒާރާއިން ވިދާޅުވީ، މިއީ ދައުލަތުގެ މާލިއްޔަތު ބެލެހެއްޓުމުގައި ރާއްޖޭގެ ފަންނީ ޤާބިލުކަން އިތުރުކޮށް، ރާއްޖޭގެ އިގްތިސާދީ އަދި ޑިމޮކްރެޓިކް ވެރިކަން އިތުރަށް ހަރުދަނާކުރުމަށް ރާއްޖެއާއި އެމެރިކާއާ ދެމެދު ސޮއިކުރެވުނު އެއްބަސްވުމެއް ކަމަށާއި، ފާއިތުވި އަހަރުތަކުގައި، ކަނޑައެޅިފައިވާ ފައިސާގެ އަދަދު މަޑުމަޑުން އިތުރުވަމުންގޮސް، މި އިޞްލާޙުގެ ދަށުން އެމެރިކާ ސަރުކާރުން ދިވެހިރާއްޖެއަށް އިތުރު 8.5 މިލިއަން ޑޮލަރު ފޯރުކޮށްދީ އެއްބަސްވުމުގެ ޖުމްލަ އަގު 45.7 މިލިއަން ޑޮލަރަށް އިތުރުކޮށްފައިވާ ކަމަށެވެ.

ޑީއޯއޭޖީގެ ސާދަ ވަނަ އިސްލާހުގައި ސޮއިކުރުމުގެ ރަސްމިއްޔާތުގައި ޚާރިޖީ ވުޒާރާ އާއި ޔޫ.އެސް.އޭ.އައި.ޑީ. މިޝަން ޓު ދަ މޯލްޑިވްސްގެ އިސް އޮފިޝަލުން ބައިވެރިވެވަޑައިގެންނެވި އެވެ.