ރާއްޖޭގައި ހިންގާ މަތީ ތަޢުލީމުގެ ކޯހެއްގައި ބައިވެރިވުމުގެ ކުރިން، އެއީ އެމްކިއުއޭއިން ހުއްދަ ދީފައިވާ ކޯހެއްތޯ ކަށަވަރުކުރުމަށް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ) އިން މިއަދު އިލްތިމާސްކޮށްފިއެވެ.

މިކަމާ ގުޅޭގޮތުން އެމްކިއުއޭއިން ވަނީ އިޢުލާނެއް ނެރެފައެވެ. އެ އިޢުލާނުގައި ބަޔާންކޮށްފައިވަނީ، ކޯހަކަށް އެންރޯލްވުމުގެ ކުރިން، އެ ޕްރޮގްރާމް އިޝްތިހާރުކޮށްފައިވަނީ އެމްކިއުއޭއިން ހުއްދަ ދީފައިވާ ގޮތަށްތޯ ބަލައި ޔަގީންކުރަންވާނެ ކަމަށެވެ. އަދި އެ ކޯހަކީ އެމްކިއުއޭއިން ހުއްދަ ދީފައިވާ ކޯސްތަކުގެ ލިސްޓުގައި ހިމެނޭ ކޯހެއްތޯ ބެލުމަށްވެސް ވަނީ އިލްތިމާސްކޮށްފައެވެ.

އެމްކިއުއޭއިން ހުއްދަ ދީފައިވާ ކޯސްތަކުގެ މަޢުލޫމާތު ބެލުމަށް ދެ ވެބްސައިޓް ލިންކެއް އެ އިޢުލާނުގައި ހިމަނާފައިވެއެވެ.

އެއީ: 

https://mqa.gov.mv/en/qualifications-register-introduction

https://old.mqa.gov.mv/institutes/local

އަދި ފާހަގަކޮށްލަންޖެހޭ ކަމަކީ، މިދިޔަ މަހު އެމްކިއުއޭއިން ވަނީ ގަވާއިދާ ޚިލާފަށް ކޯސް ހިންގަމުންދާތީ ކްލިކް ކޮލެޖާއި އެވިޑު ކޮލެޖަށް ފިޔަވަޅު އަޅާފައެވެ. މި ފިޔަވަޅު އެޅުމުގެ ކުރިން، އެ ދެ ކޮލެޖުގައި ހިންގާ ކޯސްތަކާ ގުޅޭގޮތުން އެމްކިއުއޭއަށް ޝަކުވާތަކެއް ލިބި، އެ ޝަކުވާތައް ބެލުމަށްފަހު، ޕްރޮގްރާމް އެކްރެޑިޓޭޝަން ގަވާއިދުގެ ދަށުން ފިޔަވަޅު އަޅާފައިވެއެވެ.