ރާއްޖެއަށް ކުރެއްވި ޒިޔާރަތުގައި ބެހެއްޓެވި ގާތްކަމާއި ލިބިވަޑައިގެންނެވި ފުރިހަމަ މެހެމާންދާރީއަށްޓަކައި އިންޑިއާގެ އެކްސްޓަރނަލް މިނިސްޓަރު ޖަޔަޝަންކަރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒުއަށް، ޝުކުރުއަދާ ކުރައްވައިފިއެވެ.
އިންޑިއާގެ އެކްސްޓަރނަލް އެފެއާޒް މިނިސްޓަރު ޑރ.ސުބްރަމާނިޔަމް ޖަޔަޝަންކަރު ރާއްޖެއަށް ކުރެއްވި ދަތުރުފުޅާއި ގުޅިގެން ބޭއްވި ރަސްމީ ބައްދަލުވުންތަކަށްފަހު ޑރ.މުއިއްޒު ވަނީ އިންޑިއާ އާ ގުޅޭގޮތުން އެކްސްގައި ޕޯސްޓެއް ކުރައްވާފައެވެ. މި ޕޯސްޓްގައި ރައީސް މުއިއްޒު ވިދާޅުވެފައިވަނީ، ރާއްޖޭގެ އެކި ކަންކަމުގައި އިންޑިއާގެ ބޮޑުވަޒީރު ނަރެންދްރަ މޯދީ ދެއްވާ އެއްބާރުލުމާއި، ދެގޮތެއްނުވެ އިންޑިއާއިން ރާއްޖެއަށް ދެއްވަމުން ގެންދަވާ އެހީތެރިކަމަށް ޝުކުރު އަދާކުރައްވާފައެވެ. އަދި މި ޕޯސްޓްގައި ރައީސް މުއިއްޒު ވަނީ، ދެ ގައުމުގެ ގުޅިގެން އުޖާލާ، ފާގަތި މުސްތަޤްބަލެއް ބިނާކުރައްވާނެކަން ފާހަގަކުރައްވާފައެވެ.
ރައީސްގެ އެ ޕޯސްޓާ ގުޅިގެން ޖަޔަޝަންކަރު އެކްސްގައި ކުރި ޕޯސްޓެއްގައި ވިދާޅުވީ، އެމަނިކުފާނު ރާއްޖެ ވަޑައިގަތުމުން ކިޔުއްވި މަރުހަބާ އާއި ބެހެއްޓެވި ގާތްކަމަށާއި ލިބިވަޑައިގެންނެވި ފުރިހަމަ މެހެމާންދާރީއަށް ރައީސް ޑރ.މުއިއްޒުއަށް ހިފެހެއްޓުމެއްނެތް ޝުކުރު އަދާކުރައްވާފައެވެ. އަދި ރާއްޖެއިން ބޭނުންވާ ކަންކަމުގައި ކުރިއަށްދިއުމަށް ރާއްޖެއާއެކު އިންޑިއާ އަބަދުވެސް އޮންނާނޭކަން ޖަޔަޝަންކަރުގެ ޕޯސްޓްގައި ވަނީ ތަކުރާރުކުރައްވާފައެވެ.
ރާއްޖޭގެ ހާރިޖީ ވަޒީރު މޫސާ ޒަމީރުގެ ދައުވަތަކަށް އިންޑިއާގެ އެކްސްޓަރނަލް މިނިސްޓަރު ޖަޔަޝަންކަރު ރާއްޖެ ވަޑައިގެންނެވީ އިއްޔެއެވެ. ޖަޔަޝަންކަރުގެ މި ދަތުރުފުޅުގައި ވަނީ، އިންޑިއާގެ އެހީގައި ރާއްޖޭގެ 28 ރަށެއްގައި ކުރިއަށްގެންދިޔަ ފެނާއި ނަރުދަމާގެ މަސައްކަތް ނިންމައި ދިވެހި ސަރުކާރާ ރަސްމީކޮށް ހަވާލުކުރެއްވުމުގެ އިތުރުން، ރާއްޖޭގެ އެކިއެކި ދާއިރާތައް ކުރިއެރުވުމަށް އެއްބަސްވުންތައް ޤާއިމްކޮށްފައެވެ. މީގެ އިތުރުން ޖަޔަޝަންކަރު މިއަދު މެންދުރުފަހު ވަނީ ތިލަމާލެ ބްރިޖް މަސައްކަތް ކުރިއަށްގެންދާ ގޮތްވެސް ބައްލަވާލައްވާފައެވެ.
ރާއްޖެއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ޖަޔަޝަންކަރު އެނބުރި އިންޑިއާއަށް ވަޑައިގަތުމަށް ނިންމާފައިވަނީ މާދަމާގެ ވަގުތެއްގައެވެ.
Advertisement
This content is created and paid for by advertisers and does not involve Voice Journalists
