ހުޅުމާލޭ ފޭސް އެކެއްގައި ހުންނަ މެލްޓްޒް ރެސްޓޯރެންޓްގައި މިއަދު އަލިފާނުގެ ހާދިސާއެއް ހިގައި އެކިވަރުގެ ގެއްލުންތައް ލިބިއްޖެއެވެ.

މި ހާދިސާއާ ގުޚޭގޮތުން އެމްއެންޑީއެފުން ބުނީ މި ހާދިސާގެ ރިޕޯޓް މިއަދު 10:26 ހާއިރު މާލެ ފަޔަރ ސްޓޭޝަނަށް ލިބުމާއެކު، އެމްއެންޑީއެފް މާލެ އޭރިއާ ކޮމާންޑް، ހުޅުމާލެ ފަޔަރ ސްޓޭޝަންގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ. މިގޮތުން، ހުޅުމާލެ ފަޔަރ ސްޓޭޝަންގެ ފަޔަރ ފައިޓަރުން ކުރި މަސައްކަތުން އެ ރެސްޓޯރަންޓު ބަދިގޭގައި ރޯވި އަލިފާން އެއްކޮށް ނިއްވާލެވުނީ މިއަދު 11:02 ހާއިރުއެވެ.

ވޮއިސް އާ މައުލޫމާތު ހިއްސާކުރަމުން އެވަގުތު އެތަނުގައި ހުރި މީހަކު ބުނީ އަލިފާން ހިފާފައިވަނީ އަވަނަކަށް ގުޅާފައިހުރި ގޭސް ފުޅިއެއްގައި ރޯވެގެން ކަމަށެވެ. 

މި ހާދިސާގައި ރެސްޓޯރަންޓުގެ ބަދިގޭގައި ގެންގުޅޭ ގިނަ އަދަދެއްގެ ސާމާނުތަކަށް ވަނީ ގެއްލުންވެފައެވެ. އެއްވެސް މީހަކަށް މި ހާދިސާގައި އަނިޔާއެއް ލިބިފައި ނުވެއެވެ.

އަލިފާން ރޯވި ގޭސްފުޅި... ފޮޓޯ/ވޮއިސް

ވޮއިސްއަށް މައުލޫމާތުދެމުން އެ އިމާރާތުގައި ދިރިއުޅޭ މީހަކު ބުނީ، އަލިފާނުގެ ހާދިސާގައި ރެސްޓޯރަންޓް ބަދިގެއާ ދިމާލު މަތީހުރި ކޮޓަރިއަށް އަލިފާނުގެ އަސަރުކޮށް އެކިވަރުގެ ގެއްލުންތައް ލިބިފައިވާކަމަށެވެ.