ހުޅުމާލެއަކީ ހިތްފަސޭހަ ތަނަކަށް ހެދުމަށް ކުރެވޭ މަސައްކަތްތަކުގެ ތެރެއިން، ދުވާރުމަތީގައި ބަހައްޓާފައިވާ ގޮނޑި މޭޒު ނެގުމުގެ މަސައްކަތް ކަމާބެހޭ އިދާރާތަކާ ގުޅިގެން ރަސްމީކޮށް މިއަދު ފަށާފައިވާ ކަމަށް ހައުސިންގ ޑިވެލޮޕްމެންޓް ކޯޕަރޭޝަން އިން ބުނެފިއެވެ.

2023 ނޮވެމްބަރ 15 ގައި އެޗްޑީސީ އިން ކުރި އިއުލާނާއި 2024 ޖުލައި 23 ގައި ކުރި އިއުލާންގައި ދުވާރު މައްޗާއި ހެޖުތެރޭގައި ބަހައްޓާފައިވާ ގޮނޑިމޭޒު ނެގުމަށް ވަނީ އަންގާފައެވެ.

އެގޮތުން އެ އިއުލާނުގައި ދުވާރުމައްޗާއި، ހެޖު ތެރޭގައި ގޮނޑިއާއި މޭޒު ބަހައްޓައިގެން ވިޔަފާރި އުޞޫލުން ޚިދުމަތްދިނުމަކީ މަނާކަމެއް ކަމަށް އެޗްޑީސީ އިން ވަނީ ބުނެފައެވެ.

Advertisement

ދުވާރުމައްޗާއި ހެޖުތެރޭގައި ބަހައްޓާފައިވާ ގޮނޑިއާއި މޭޒު އެ އިއުލާންގައި ދެންނެވިފައިވާ ސުންގަނޑިއަށް ނުނަގާނަމަ އެތަކެތި ނަގައި އެސަރަހައްދުތައް ސާފުކުރުމުގެ މަސައްކަތް ކަމާ ގުޅުންހުރި އިދާރާތަކާ ގުޅިގެން އެ ކޯޕަރޭޝަނުން ކުރިއަށް ގެންދާނޭކަމަށް ވެސް އެޗްޑީސީ އިން ވަނީ ބުނެފައެވެ.

އަދި އެމަސައްކަތުގެ ތެރޭގައި މުދަލަށް ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެކަމަށް ވެސް ވަނީ ބުނެފައެވެ.

ނަމަވެސް އެ ނުނެގުމުން އެ އެޗްޑީސީން މިހާރު ވަނީ އެތަކެތި ނެގުމުގެ މަސައްކަތް ފަށާފައެވެ.