ކުރީގެ ރައީސް އިބްރާހީމް މުހައްމަދު ޞާލިހްގެ ސަރުކާރުން ފެށި ބިންވެރިޔާ ސްކީމުގެ ގޯތި ލިބުނު އެއްވެސް މީހަކު މަރުވެފައިވާނަމަ އަދި މަރުވެއްޖެ ނަމަ، އެ ގޯތި އެ މީހެއްގެ ވާރިސުންނަށް ލިބޭނެކަމަށް ގެދޮރުވެރިކަމާ ބެހޭ ވުޒާރާއިން ބުނެފިއެވެ.

ގެދޮރުވެރިކަމާ ބެހޭ ވުޒާރާއިން މިއަދު ނެރުނު އިއުލާނެއްގައި ބުނީ ބިންވެރިޔާ ސްކީމްގެ ދަށުން ބިން ލިބިފައިވާ ފަރާތްތަކުގެ ތެރެއިން އެޕްލިކަންޓެއް ނުވަތަ އެޕްލިކަންޓް ނިޔާވެފައިވާނަމަ ޝަރުއީ ކޯޓުން ވާރިސުން ސާބިތުކޮށްދީ، ގަޒިއްޔާ ނިމުނު ގޮތުގެ ރިޕޯޓު މިނިސްޓްރީގެ ހިޔާވެހި ޕޯޓަލް www.hiyaavehi.housing.gov.mv ހުށަހަޅައި އެޕޮއިންޓްމަންޓަށް އެދުމުން އެއްބަސްވުމުގައި ސޮއިކުރުމުގެ އިންތިޒާމު ހަމަޖައްސައިދެވޭނެ ކަމަށެވެ.

ރައީސް ޞާލިހުގެ ސަރުކާރުން ބިންވެރިޔާ ސްކީމްގެ ދަށުން ގިރާވަރުފަޅާއި ގުޅިފަޅާއި އަދި ހުޅުމާލެ އިން ދޫކުރަން ނިންމި ގޯތިތަކަށް އެދި ހުށަހެޅި ފަރާތްތަކުގެ ތެރެއިން 18،955 ފަރާތެއްގެ ޝަރުތު ހަމަވެފައިވާއިރު އޭގެ ތެރެއިން 9،0003 މީހަކަށް ގޯތި ދިނުމަށް އެ ސަރުކާރުން ވަނީ ނިންމައިފައެވެ.

ބިންވެރިޔާ ސްކީމުގެ ތެރެއިން ދޫކުރާ ގޯތިތަކުގެ ތެރެއިން ޖުމުލަ 624 ގޯތި މިހާތަނަށް ދޫކޮށްފައިވާކަމަށް ހައުސިންގް މިނިސްޓްރީން ވަނީ ބުނެފައެވެ. އަދި ގޯތި ދޫކުރި ފަޅުތައް ހިއްކައި ދެން ހުރި ގޯތިތައްވެސް ހަވާލު ކުރުމުގެ މަސައްކަތް ކުރައްވާ ކަމަށް ހައުސިން މިނިސްޓަރު ޑރ. އަލީ ހައިދަރު އިއްޔެ ރައްޔިތުންގެ މަޖިލީހުގައި ވަނީ ވިދާޅުވެފައެވެ.

އެގޮތުން، ހުޅުމާލެ ދެވަނަ ފިޔަވަހިން ދޭންޖެހޭ ހުރިހާ ގޯއްޗެއް އޮކްޓޯބަރު މަހުގެ ނިޔަލަށް ހަވާލުކުރެވޭނެ ކަމަށް ވިދާޅުވިއެވެ.