މާލޭ ބާޒާރުގައި ލުނބޯ ކިލޯއެއްގެ އަގު 140 ރުފިޔާއަށް އުފުލިއްޖެއެވެ.
ފާއިތުވި ދުވަސްތަކުގައި ބާޒާރުގައި ލުނބޯ ވިއްކަން ހުރި އަގު ބޮޑުކަން ފާހަގަކޮށްލެވޭއިރު، މިދިޔަ ހަފްތާގައި ބާޒާރުގައި ލުނބޯ ކިލޮއެއް ލިބެން ހުރީ 120 ރުފިޔާއަށެވެ. އެ ހަފްތާގައި ބާޒާރުގައި އެންމެ އަގުހެޔޮކޮށްވެސް ލުނބޯ ކިލޯއެއް ލިބެންހުރީ 90 ރުފިޔާއަށެވެ.
މީގެ ކުރިން ލުނބޯ ކިލޯއެއް 35 ރުފިޔާއަށް ވިއްކާފައިވާއިރު، މިކަމާއި ގުޅިގެން "ވޮއިސް" އަށް މައުލޫމާތުދެމުން ބައެއް ގޮޅިތަކުގެ ސޭޓުން ބުނީ، ލުނބޯގެ އަގު ބޮޑުވީ ލިބޭ އަދަދުވެސް މަދުވުމާ ގުޅިގެންކަމަށާއި، މޫސުން ގޯސްވުމުން ކަނޑުމަގުން ލުނބޯ ލިބުމުގައި ދަތިތަކެއް އުޅޭކަމަށެވެ.
މީގެ ކުރިންވެސް އެކި ފަހަރުމަތިން ލުނބޯގެ އަގު ބާޒާރުގައި މަތިވެފައިވާއިރު، މިއަހަރުގެ ރަމަޟާން މަހުވެސް ލުނބޯގެ އަގު އުފުލުމާއި ގުޅިގެން، އަގު ސަރުކާރުން ކޮންޓްރޯލްކުރީ އެސްޓީއޯ މެދުވެރިކޮށް ލުނބޯ ގެނެސްގެންނެވެ.
ލުނބޯގެ އިތުރުން މާލޭ ބާޒާރުގައި ކެރެޓާއި ތަރުކާރީގެ އިތުރު ބާވަތްތަކުގެ އަގުތައްވެސް ވަނީ އުފުލިފައެވެ. މާލޭ ބާޒާރުގައި ގިނަ ފަހަރަށް ތަކެތީގެ އަގުބޮޑުކުރަނީ އެ އެއްޗެއް ލިބުން ދަތިވުމުންނެވެ.
Advertisement
This content is created and paid for by advertisers and does not involve Voice Journalists
