ބިދޭސީ މަސައްކަތްތެރިންގެ ފީތައް ބޮޑުކުރެވޭގޮތަށް ހުށަހެޅުނު މަޖިލީހުން ފާސްކޮށްފިއެވެ.

ސަރުކާރުގެ ފަރާތުން ކުޅުދުއްފުށީ އުތުރު ދާއިރާގެ މެންބަރު މުހައްމަދު ދާއޫދު ހުށަހެޅުއްވި މި ބިލަށް ކޮމިޓީ މަރުހަލާގައި ގެނެވުނު އިސްލާހު ތަކާއެކު ފާސްކޮށްފައިވަނީ 65 މެންބަރުންގެ ވޯޓުންނެވެ. އެ ބިލާ ދެކޮޅަށް އެމްޑީޕީގެ 10 މެންބަރުން ވަނީ ވޯޓުދީފައެވެ.

ވަޒީފާގެ ގާނޫނަށް އިސްލާޙު ގެނައުމުގެ ބިލު ދިރާސާކޮށްފައިވަނީ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީންނެވެ. އެ ބިލަށް ކޮމިޓީން ހަތަރު އިސްލާހު ވަނީ ގެނެސްފައެވެ. 

އެގޮތުން ރާއްޖެއަށް ބިދޭސީން ގެނެވޭނެ އަދަދުތަކާ ދާއިރާތައް ކަނޑައެޅުމުގައި އަހަރެއްގެ ތެރޭގައި ރާއްޖެއަށް ބިދޭސީން ގެނެވޭނެ އަދަދާއި، ދާއިރާތަކާ، އެއް ގައުމަކުން އެންމެ ގިނައިން ބިދޭސީން ގެނެވޭނެ އަދާދާއި ދާއިރާތަށް ކަނޑައަޅާ އަހަރަކު ދެ ފަހަރު އާންމު ކުރަން ވާނެ ކަމަށް ބަޔާންކޮށް ވަނީ  އިސްލާހު ގެނަސްފައެވެ

ހަމައެހެންމެ، ރާއްޖޭގައި ވަޒީފާއަދާކުރަން ބިދޭސީން ގެންނަ ފަރާތްތަކުން މިނިސްޓްރީގައި ބަހައްޓަން ޖެހޭ ސެކިއުރިޓީ ޑިޕޮސިޓް ނެގުމުގެ މިންގަނޑު ބަޔާންކުރުމުގެ ގޮތުން ވެސް ކޮމިޓީން ބިލަށް އިސްލާހު ގެނަސްފައިވެއެވެ.

މީގެ އިތުރުން، ވަޒީފާއާބެހޭ ގާނޫނުގައި މިހާރު ބަޔާންކޮށްފައި އޮންނަ ގޮތުން ބިދޭސީ މަސައްކަތްތެރިން ވޯކް ޕާމިޓުގެ ގޮތުގައި 350 ރުފިޔާ ދައްކަންޖެހެއެވެ. އަދި، ކޯޓާ ފީގެ ގޮތުގައި އަހަރަކު 2،000 ރުފިޔާ ދައްކަންޖެހެއެވެ.

ނަމަވެސް ސަރުކާރުން ހުށަހެޅި އިސްލާހުގެ ދަށުން ކޮންމެ 18 މަސް ދުވަހަކުން އެއްފަހަރު އެ އަދަދު ބަދަލުކުރުމުގެ އިޚުތިޔާރު ސަރުކާރަށް ލިބެއެވެ. އަދި އެ ކަނޑައެޅުނު އަަދަދު 30 ޕަސަންޓަށް ވުރެ އިތުރުވެގެން ނުވާނެ ކަމަށްވެސް ބުނެފައިވެއެވެ. 

ހަމައެއާއެކު އެ އިސްލާހުގައިވަނީ، އިހުމާލުވާ މީހުންގެ މައުލޫމާތު އާންމު ކުރުމާއި އެ މީހުން 50،000 ރުފިޔާއިން ޖޫރިމަނާކުރުން ހިމަނާފައެވެ. އެއާ އެކު އިހުމާލުވާ ފަރާތްތަކުން ބިދޭސީން ގެނައުމުގެ ޚިދުމަތްތައް ވަކި މުއްދަތަކަށް ދިނުން ހުއްޓާލެވޭނެ ކަމަށް ވެސް ބަޔާންކޮށްފައިވެއެވެ.

މި ބިލުގައިވާ އިތުރު އިސްލާހުތަކުގެ ތެރޭގައި ގާނޫނާ ޚިލާފަށް މަސައްކަތް ކުރާ ވާރކްސައިޓުތައް ކަމަށް ބެލެވޭ ތަންތަން ދުރާލާ އެންގުމަށްފަހު ނުވަތަ ދުރާލާ ނޯޓިސް ދިނުމަކާ ނުކައި އެ ސައިޓުތަކަށް ވަދެ، ބަލައި ފާސްކުރުމުގެ ބާރު އިންސްޕެކްޓަރުންނަށް ލިބޭ ގޮތަށް އިސްލާހެއް ހުށަހަޅާފައިވެއެވެ.