‏މޫނު ބުރުގާ އެޅުމަކީ ވަޒީފާއިން މަޙްރޫމްވާން ޖެހޭނެ ކަމެއްނޫން ކަމަށް އިސްލާމީ ކަންތައްތަކާބެހޭ ވުޒާރާގެ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ދ.ހުޅުދެލީ މެޖިސްޓްރޭޓް ކޯޓުގެ ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ވަޒީފާއަށް ކުރިމަތިލެއްވި ފަރާތެއް މޫނު ބުރުގާ އަޅާތީ ރެކްރޫޓްމެންޓް ޕްރޮސެސް ގައި ނުހިމަނާ ޑިސްކޮށްލިފައި ކޮށްލާފައުވާ ކަމަށްބުނެ، ފެތުރެމުންދާ ވާހަކައާއި ގުޅިގެން ވަޒީރު އެކްސްގައި ކުރެއްވި ޕޯސްޓެއްގައި ވިދާޅުވީ، ތަހުޒީބު މުޖުތަމަޢެއް ބިނާކުރެވޭނީ އެންމެންނަށް ޙައްޤުތައްދީގެންކަމަށެވެ.

މި މައްސަލާގައި ހުޅުދެލީ މެޖިސްޓްރެޓް ކޯޓުން ބުނީ، ޝަރުއީ ދާއިރާގެ މުވައްޒަފުންގެ ޤަވައިދު2011 ގެ 129 ވަނަ މާއްދާގައި މުވައްޒަފުން މަސައްކަތު ގަޑީގައި ހެދުން އަޅާފައި ހުންނަންވާނީ ކާކުކަން ރަގަނޅަށް އެނގޭފަދަ ގޮތެއްގައި ކަމަށް ބަޔާންކޮށްފައިވާކަމަށެވެ.

އެހެންކަމުން އެ ފަރާތަކީ މޫނުބުރުގާ އަޅާފަރާތެއްކަން ކަށަވަރުކުރުމަށްފަހު މޫނު ބުރުގާ އަޅާނަމަ ރެކްރޫޫޓްމަންޓް ޕްރޮސެސް ކުރިއަށް ގެންދަން ނުފެންނަ ކަމަށް ގަވާއިދުގައި ވާތީ، އެ ފަރާތުން އިންޓަވިއުއާއި ޕްރެކްޓިކަލް ކުރިއަށް ދިޔައިރު އެ ފަރާތަކީ މޫނު ބުރުގާ އަޅާ ފަރާތަކަށް ވުމުންް އެ ކޯޓުން ވަނީ އޭނާ ވަނީ ރެކްރޫޓްމަންޓް ޕްރޮސެސްގައި ނުހިމަނާ ޑިސްކޮލިފައި ކޮށްފައެވެ.

ހުޅުދެލި ކޯޓުން މިފަދައިން ކަން ކޮށްފައުލިވާއިރު، މި މައްސަލާގައި ރައީސް މުޢިއްޒު މިއަދު ކުރެއްވި ޕޯސްޓެއްގައިވަނީ، އަޅާ ހެދުމެއްގެ ސަބަބުން ވަޒީފާދިނުމުގައި އަދި ވަޒީފާ އަދާކުރުމުގައި އެއްވެސް ތަފާތެއް ކޮށްގެން ނުވާނެ ކަމަށާ، އެފަދަ ތަފާތު ކުރުން ގެނުވާގޮތަށް ކުރީގައި ހަދާ އަދިވެސް ޢަމަަލުކުރަމުންދާ ހުރިހާ ގަވާއިދުތަކާއި އުސޫލުތައް ބަދަލު ކުރުމަކީ ކުރަންޖެހޭ ކަމެއްކަން ފާހަގަކުރައްވާ ފައެވެ.

އަދި ރައީސް ޑރ.މުޢިއްޒު ވިދާޅުވީ، އެ އުސޫލުތައް ބަދަލުކުރުމަށް ކަމާބެހޭ ފަރާތްތަކަށް މިހާރު އަންގާފައިވާ ކަމަށެވެ.