ކާނާގެ ރައްކާތެރިކަމަކީ މިނސަރުކާރުން ކޮންޕްރޮމައިޒް ކުރާނެ ކަމެއް ނޫން ކަމަށާ، ގަވާއިދާ ޚިލާފަށް ރައްކާތެރި ނޫންކޮށް ކާނާ އުފައްދާ ފަރާތްތައް ބޮޑު ވެގެން އެއް މިލިއަން ރުފިޔާއިންވެސް ޖޫރިމަނާ ކުރެވޭނެ ކަމަށް ސިއްޙަތާ ބެހޭ ވަޒީރު ޑރ.އަބްދުالله ޚަލީލް ވިދާޅުވެއްޖެއެވެ. 

ވަޒީރު ވިދާޅުވީ 23 އޯގަސްޓް އިން ފެށިގެން، ކާބޯތަކެތީގެ ރައްކާތެރިކަމާބެހޭ ގާނޫނަށް ޢަމަލުކުރަން ފެށޭނެ ކަމަށެވެ. އެއާއެކު، ކާބޯތަކެތި ތައްޔާރުކުރާތަންތަން ބަލައި ފާސްކޮށް، އެތަންތަން ބަންދުކޮށް ރަނގަޅު ކުރާ ހިސާބުން އެތަންތަން ހުޅުވުމުގެ ބާރު އެމްއެފްޑީއޭއަށް ލިބިގެންދާ ކަމަށެވެ. 

މީގެ އިތުރުން، މިހާތަނަށް ކާބޯތަކެތި ތައްޔާރުލުރާ ފަރާތްތައް ޒިންމާކުރެވޭނެ ގޮތެއް ނޯންނަ ކަމަށެވެ. އެހެން ނަމަވެސް، މި ގާނޫނާއެކު، އެފަދަ ފަރާތްތައް ގާނޫނާ ޚިލާފް ވާނަމަ، ތަފާތު އަދަބުތައްވެސް ކަނޑައެޅިގެންދާ ކަމަށެވެ.

Advertisement

އެގޮތުން، ކުށުގެ ބާވަތަށް ބަލައި 10،000 ރުފިޔާއިން ފެށިގެން 50،000 ރުފިޔާއަށް ޖޫރިމަނާ ކުރުމުގެ ފުރުސަތު ލިބިގެންދާ ކަމަށާ، އަދި އެންމެ ބޮޑު ޖޫރިމަނާއެއްގެ ގޮތުގައި އެއްމިލިއަން ކަމޑައެޅިފައިވާ ކަމަށް ވަޒީރު ވިދާޅުވިއެވެ. 

މިއާއެކު ވަޒީރު ވިދާޅުވީ އެ ގާނޫނު ތަންފީޒުވެ އަމަލުކުރަން ފެށުމުން އިސްލާޙް ކުރަންޖެހޭ ކަންކަންވެސް އެނގިގެންދާނެ ކަމަށާ، އެ އެގުމާއެކު ގާނޫނަށް އިސްލާހުތައްވެސް ގެނެވޭނެ ކަމަށެވެ. 

މީގެ އިތުރުން ކާބޯތަކެތީގެ ރައްކާތެރިކަން އިތުރަށް ކަށަވަރު ކުރުމަށް، އެފަދަ ތަންތަނުގެ ޝަކުވާ ފަސޭހައިން ހުށަހެޅޭނެ ގޮތެއް ތަޢާރަފް ކުރައްވާނެ ކަމަށާ، އެގޮތުން އެމްއެފްޑީއޭގެ ހޮޓްލައިނެއް މިހާރުވެސް ތަޢާރަފްކިރެވިފައިވާ ކަމަށާ، އެ ނަންބަރަށް ފޮޓޯ އާއި ޝަކުވާ ހުށަހެޅުމުން ފަސޭހައިން ބެލޭނެ ނިޒާމެއް ހަމަޖައްސަވާނެ ކަމަށް ވަޒީރު ވިދާޅުވިއެވެ. އަދި އެކަމުގައި އާއްމުންގެ އެހީތެރިކަން ވަރަށް ބޭނުންވާނެ ކަމަށްވެސް ވިދާޅުވިއެވެ.