މާލޭގައި މީހަކު ރަހީނުކޮށް އިނގިއްޔެއް ބުރިކޮށްލި މައްސަލައިގައި އިތުރު މީހަކު ހައްޔަރުކޮށްފި އެވެ.
މާލޭގައި މީހަކު ރަހީނު ކުރުމަށް ފަހު އެ މީހާގެ އިނގިއްޔެއް ބުރިކުރި މައްސަލާގައި މިދިޔަ ޖުލައި މަހު ތިން މީހަކު ޝަރީޢަތް ނިމެންދެން ބަންދުކުރުމަށް ކްރިމިނަލް ކޯޓުން އަމުރު ކޮށްފައިވެއެވެ.
އެގޮތުން އޭރު ބަންދުކުރަން އަމުރު ކުރީ ތިމަރަފުއްޓަށް ނިސްބަތްވާ 21 އަހަރުގެ މީހަކާއި، ރ. ކަނދޮޅުދޫއަށް ނިސްބަތްވާ 23 އަހަރުގެ މީހަކާއި، ގދ. ގައްދޫއަށް ނިސްބަތްވާ 18 އަހަރުގެ މީހެކެވެ.
ހައްޔަރުކުރި ތިން މީހުންނަކީ ވެސް އަނިޔާ ލިބުނު މީހާއާ އެއް ތަނެއްގައި މަސައްކަތް ކުރާ މީހެއް ކަމަށް މި މީހުން ކޯޓުގައި ބުނެފައި ވެއެވެ.
މި މައްސަލާގައި ފަހުން ހައްޔަރުކޮށްފައިވަނީ 23 އަހަރުގެ ފިރިހެނެކެވެ. އޭނާ ހައްޔަރުކޮށް ކޯޓަށް ހާޒިރުކުރުމުން ތަހުގީގު މަރުހަލާ ނިމެންދެން ބަންދުކޮށްފައި ބެހެއްޓުމަށް ވަނީ އަމުރުކޮށްފަ އެވެ.
މި މައްސަލައިގައި ހައްޔަރުކޮށްފައިވާ އެންމެންގެ މައްޗަށްވެސް ތުހުމަތު ކުރަނީ ތޫނު އެއްޗެއް ބޭނުންކޮށްގެން މާރާމާރީ ހިންގުމާއި ޖެހުމާއި ހުއްދަ ނޫން ގޮތުގައި މީހުން ހިފެހެއްޓުމުގެ ކުށުގެ ތުހުމަތެވެ.
Advertisement
This content is created and paid for by advertisers and does not involve Voice Journalists
