ކާބޯތަކެތީގެ ރައްކާތެރިކަމާއި ގުޅޭ މައްސަލަތައް ރިޕޯޓުކުރުމަށް ހަމަޖެއްސި ހާއްސަ ނަމްބަރު އާއްމުކޮށްފިއެވެ.

އެގޮތުން ހެލްތު މިނިސްޓްރީން އާއްމު ކުރި ނަންބަރަކީ 7603204 އެވެ.

މި ނަންބަރާއެކު، އާއްމު ސިއްޚަތާއި ގުޅޭ ޝަކުވާތައް ހުށަހެޅުމަށް އެޗްޕީއޭއިންވެސް ވަނީ ހޮޓްލައިން ނަންބަރާއި މެއިލެއް އާއްމު ކޮށްފައެވެ. އެގޮތުން އާއްމުކޮށްފައިވާ ވަޓްސްއެޕާއި ވައިބާ އިން ޝަކުވާ ހުށަހަޅާނެ ނަންބަރަކީ، 7960121 އެވެ. އަދި ރަސްމީ ގަނޑިތަކުގައި 3024570 ގުޅައިގެންވެސް ޝަކުވާ ހުށަހެޅޭއިރު [email protected]އަށް ސުވާލު މެއިލް ވެސް ކުރެވޭނެ ކަމަށް ބުބެފައިވެއެވެ.

ހެލްތު މިނިސްޓްރީން އިއްޔެ ބޭއްވި ނޫސއވެރިންގެ ބައްދަލުވުމުގައި، މިނިސްޓަރު ޑރ. އަބްދުالله ޚަލީލް ވަނީ ކާބޯތަކެތީގެ ރައްކާތެރިކަމާގުޅޭ މައްސަލަތައް ރިޕޯޓުކުރުމަށް އިންނަނީ ތަންކޮޅެއް އުދަނގޫ ޕްރިސީޖާއެއް ކަން ފާހަގަކުރައްވައި، ކާބޯތަކެތީގެ ރައްކާތެރިކަން ކަށަވަރުކުރުމަށްޓަކައި އެފަދަ މައްސަލަތައް ފަސޭހައިން ރިޕޯޓްކުރެވޭނެ މެކޭނިޒަމްއެއް ގާއިމްކުރައްވާނެ ކަމަށް ވިދާޅުވެފައެވެ.

އެގޮތުން ޑރ. ޚަލީލް ވިދާޅުވީ ކާބޯތަކެތީގެ މައްސަލަތައް ރިޕޯޓުކުރުމަށް ކަނޑައަޅާ ހާއްސަ ނަންބަރަށް ފޮޓޯތަކާއި ވީޑިއޯތައް ވަޓްސްއަޕް އަދި ވައިބާ މެދުވެރިކޮށް ފޮނުވޭނެކަމަށެވެ.ު

މީގެ އިތުރުން މިނިސްޓަރ ވިދާޅުވީ މިއަދުން ފެށިގެން، ކާބޯތަކެތީގެ ރައްކާތެރިކަމާބެހޭ ގާނޫނަށް ޢަމަލުކުރަން ފެށޭނެ ކަމަށެވެ. އެއާއެކު، ކާބޯތަކެތި ތައްޔާރުކުރާތަންތަން ބަލައި ފާސްކޮށް، އެތަންތަން ބަންދުކޮށް ރަނގަޅު ކުރާ ހިސާބުން އެތަންތަން ހުޅުވުމުގެ ބާރު އެމްއެފްޑީއޭއަށް ލިބިގެންދާ ކަމަށެވެ. 

މިނިސްޓަރު ވިދާޅުވީ، މިހާތަނަށް ކާބޯތަކެތި ތައްޔާރުލުރާ ފަރާތްތައް ޒިންމާކުރެވޭނެ ގޮތެއް ނޯންނަ ކަމަށެވެ. އެހެން ނަމަވެސް، މި ގާނޫނާއެކު، އެފަދަ ފަރާތްތައް ގާނޫނާ ޚިލާފް ވާނަމަ، ތަފާތު އަދަބުތައްވެސް ކަނޑައެޅިގެންދާ ކަމަށެވެ.

އެގޮތުން، ކުށުގެ ބާވަތަށް ބަލައި 10،000 ރުފިޔާއިން ފެށިގެން 50،000 ރުފިޔާއަށް ޖޫރިމަނާ ކުރުމުގެ ފުރުސަތު ލިބިގެންދާ ކަމަށާ، އަދި އެންމެ ބޮޑު ޖޫރިމަނާއެއްގެ ގޮތުގައި އެއްމިލިއަން ކަމޑައެޅިފައިވާ ކަމަށް ވަޒީރު ވިދާޅުވިއެވެ.