ނިމިދިޔަ އެމްޑީޕީ ސަރުކާރުން ބަޖެޓު ސަޕޯޓަށް ނަގާފަައިވާ ލޯނުތަކަކީ ލުއި ލޯނުތަކެއް ނޫންކަމަށް އޮޑިޓާ ޖެނެރަލް އޮފީހުން ބުނެފި އެވެ. 

އޮޑިޓު އޮފީހުން ބުނީ ދަރަންޏާ ގުޅޭ ސްޓްރެޓެޖީގައި ދަރަނީގެ އެވެރެޖު އިންޓަރެސްޓު ރޭޓު 4 ޕަސެންޓުގައި ހިފަހެއްޓުމަށް އަމާޒުކޮށްފައިވީ ނަމަވެސް އެކަން ހާސިލުކުރުމަށް ކުރީގެ ސަރުކާރުން އެއްވެސް މަސައްކަތެއް ކޮށްފައެއް ނުވެ އެވެ.

އަދި ކޮންސެޝަނަލް ލުއި ލޯނަކީ ރަނގަޅަށް ޕްލޭނު ކުރެވިގެން ރޭވުންތެރިކަމާއެކު ޖަވާބުދާރީވަނިވި ނިޒާމެއްގެ ތެރެއިން މަސައްކަތް ނުކުރެވިއްޖެނަމަ ހޯދަން އުދަނގޫވާނެ ލޯނުތަކެއް ކަމަށްވާއިރު އެފަދަ ލޯނުތައް އާންމުކޮށް ދެނީ ވަކިވަކި މަޝްރޫއުތަކަށް ނުވަތަ ތަރައްގީގެ ވަކި އަމާޒުތަކެއް ހާސިލުކުރުމަށް ކަމަށް އޮޑިޓް އޮފީހުން ބުނެއެވެ. 

އަދި ނިމިދިޔަ ސަރުކާރަށް ބަޖެޓު ސަޕޯޓުގެ ގޮތުގައި ލުއި ލޯނުތައް ހޯދުމަށް ގޮންޖެހުންތަކާއި ކުރިމަތިވި ކަމަށާ އޭގެ ސަބަބުން ލޯނުތަކުގެ އިންޓަރެސްޓު ރޭޓު މަތިވެފައިވާކަން އޮޑިޓު އޮފީހުން ފާހަގަކުރި އެވެ. 

އޮޑިޓް އޮފީހުން އިތުރަށް ބުނީ އަންނަ އަހަރު ދައްކަންޖެހޭ ލޯނުތަކުގެ ތެރެއިން ޑޮމެސްޓިކް ރިޕޭމަންޓް ބޮޑުތަނުން އިތުރުވާނެ ކަމަށް ބެލެވޭ ކަމަށާއި އެއީ މޯލްޑިވްސް ޕެންޝަނަށް ވިއްކި ޑޮމެސްޓިކް ބޮންޑުތައް ހަމަވުމުން ކަމަށެވެ. މީގެތެރޭގައި 1.16 ބިލިއަން ރުފިޔާއާއި ބޭންކް އޮފް މޯލްޑިވްސް (ބީއެމްއެލް)އަށް ވިއްކި ބޮންޑެއްގެ ޕޭމަންޓުގެ ގޮތުގައި އަދާކުރަންޖެހޭ 200 މިލިއަން ޑޮލަރު ވެސް ހިމެނެ އެވެ.

މީގެ އިތުރުން 2022 ވަނަ އަހަރު ބަޖެޓު ސަޕޯޓުގެ ގޮތުގައި ނަގާފައިވާ ލޯނުތަކުގެ ޕްރިންސިޕަލް ޕޭމެންޓުގެ ގޮތުގައި 2025 އަހަރު 1.5 ބިލިއަން ރުފިޔާ ދައްކަންޖެހެ އެވެ. އެއީ އެ އަހަރު ބަޖެޓު ސަޕޯޓުގެ ގޮތުގައި ނަގާފައިވާ 25 މިލިއަން ޑޮލަރުގެ ހަތަރު ލޯނަކަށް ޖުމްލަ 100 މިލިއަން ޑޮލަރު ދައްކަންޖެހޭތީ އވެެ. 

އޭގެ އިތުރަށް އިންޑިޔާއިން ނަގާފައިވާ ލައިން އޮފް ކްރެޑިޓުގެ ޕްރިންސިޕަލް އަދާކުރަން ފަށަންޖެހެނީވެސް އަންނަ އަހަރު އެވެ. އެލްއޯސީގެ ޕްރިންސިޕަލް ޕޭމެންޓު އަދާކުރުމަށް، އިތުރު 397.4 މިލިއަން ރުފިޔާ އަންނަ އަހަރު ހަރަރުވާނެ އެވެ.