އިވަހަންދިއްޕޮޅުގައި ބަންކަރިންގެ ހިދުމަތް ފެށުމުން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މެރިޓައިމްގެ 14 ހިދުމަތެއް ފޯރުކޮށްދޭނޭ ކަމަށް އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވެއްޖެއެވެ.
ޕީއެސްއެމް ގެ "ރާއްޖެ މިއަދު" ޕްރޮގްރާމްގައި ވާހަކަފުޅު ދައްކަވަމުން ވަޖީހު ވިދާޅުވީ، ބަންކަރިންގެ ހިދުމަތް ފަށަން ނިންމާފައިވަނީ ސެޕްޓެމްބަރު މަހުގެ 19 ވަނަ ދުވަހު ކަމަށާއި، ބަންކަރިން ހިދުމަތް ހަމަ އެ ދުވަހުން ފެށިގެން ލިބޭނޭކަމަށެވެ.
ބަންކަރިންގެ ހިދުމަތް ދިނުމުގެ އިތުރުންވެސް، އެމްޕީއެލުންވެސް ކަންތައްތަކެއް ރާވާފައިވާ ކަމަށާއި، އެގޮތުން 14 ހިދުމަތެއް ދިނުމަށް ނިންމާފައިވާއިރު އެކަންކަން މިހާރުވެސް ފެށުމަށް ތައްޔާރުވެރުވެފައިވާ ކަމަށް ވަޖީހު ވިދާޅުވިއެވެ. އޭނާ ވިދާޅުވީ، މިއީ ކަސްޓަމަރަކު ބޭނުންވާ ގޮތަށް ދެވޭ ހިދުމަތްތަކެކެވެ.
އަޅުގަނޑުމެން އެބަހުރި އެމްޕީއެލުން ރާވާފައި ހުރި ކަންތައްތަކެއް. މި ދެންނެވި ތެލުގެ ހިދުމަތް ބޯޓުފަހަރަށް ދޭއިރުގައި އެއާއިގުޅިގެން އަދި ހަމަ ނުފުދޭނެ ބޯޓުފަހަރަށް ބޭނުންވާ ވަރަށް ގިނަ ކަންތައްތަކެއް ހުންނާނެ. އަޅުގަނޑުމެން ދޭ ބޭނުންވާ ހިދުމަތްތަކުގެ ވާހަކަ އަޅުގަނޑުމެންގެ ވެބްސައިޓުގައި ގާއިމު ކޮށްފައިވާނެ. އެގޮތުން 14 ހިދުމަތެއް ވާނެ އަޅުގަނޑުމެން ހާމަކޮށްފައި
ވަޖީހު ވިދާޅުވިއެވެ.
ބަންކަރިން ހިދުމަތް ފަށާއިރު، ޕައިލެޓޭޖާއި ކްރޫ ބަދަލުކުރުމާއި ކާބޯތަކެތި ފޯރުކޮށްދިނުމާއި މެއިންޓަނަންސް ޚިދުމަތް އަދި ޓަގް ޚިދުމަތް ފަދަ ޚިދުމަތްތައް ހިމެނޭކަމަށް ވަޖީހު ވިދާޅުވިއެވެ.
ވަޖީހު އިތުރަށް ވިދާޅުވި ގޮތުގައި، ބަންކަރިންގެ ޚިދުމަތް މި މަހު އޮފް-ޝޯކޮށް ފެށިނަމަވެސް ދެވަނަ ފިޔަވަހީގެ ދަށުން ބޯޓުތައް ހޯރަފުއްޓަށް ބަނދަރުކޮށްގެން ޚިދުމަތްދިނުމަށް އިހަވަންދިއްޕޮޅަށް ބޮޑު ބަދަލެއް ގެންނަން ނިންމާފައިވާކަމަށެވެ. އޭގެ ތެރޭގައި ދެވަނަ ފިޔަވަހީގައި ހއ. ހޯރަފުށި ފަޅު ހިއްކައިގެން، އެތަނުގައި ތެޔޮ ޓާމިނަލަކާއި ބައިނަލްއަގުވާމީ ފެންވަރުގެ ކޮންޓެއިނާ ޓާމިނަލެއް ތަރައްގީކުރުން ހިމެނެއެވެ.
ރާއްޖެއާ ކައިރީ ބައެއް ޤައުމުތަކުން ބަންކަރިން ހިދުމަތްތައް ދެމުން އައިނަމަވެސް ރާއްޖެއިން މިކަމުގައި ކުރިހޯދާނީ ވާދަވެރި މާކެޓެއްގެ ތެރެއިންކަމަށްވެސް އެމްޕީއެލުން ބުނެއެވެ.
Advertisement
This content is created and paid for by advertisers and does not involve Voice Journalists
