އިސްރާއީލްގެ ބޮޑުވަޒީރު ނަތަންޔާހޫ މަރައިލަން އީރާނުން ރޭވި ރޭވުމުގައި ބައިވެރިވި ކަމަށް ބުނެ އިސްރާއީލް މީހަކު ހައްޔަރުކޮށްފިއެވެ.

އިސްރާއީލުގެ ސަލާމަތީ ޚިދުމަތްތަކުން މަޢުލޫމާތު ދީފައިވާ ގޮތުގައި، އިސްރާއީލުގެ ބޮޑުވަޒީރު ބެންޖަމިން ނެތަންޔާހޫއާއި އެހެން އިސް ވެރިން މަރަން އީރާނުން ރޭވި ރޭވުމެއްގައި ބައިވެރިވި ކަމުގެ ތުހުމަތުގައި އިސްރާއީލުގެ ރައްޔިތަކު ވަނީ ހައްޔަރުކޮށްފައެވެ.

އިސްރާއީލުގެ ފުލުހުންނާއި އެތެރޭގެ އިންޓެލިޖެންސް އިދާރާއިން ބުނެފައިވަނީ މި މީހާ ދެފަހަރެއްގެ މަތިން އީރާނަށް ވަދެ، އެކި މިޝަންތައް ކުރިއަށް ގެންދިއުމަށް ފައިސާ ލިބިފައިވާ ކަމަށެވެ. ހައްޔަރުކުރެވުނު މީހާއަކީ ވިޔަފާރިވެރިއެއް ކަމަށާއި، އޭނާ ތުރުކީގައި ދިރިއުޅެފައިވާ ކަމަށާއި، އީރާނަށް ވަނުމަށް ތުރުކީގެ ގުޅުންތަކުގެ އެހީ ލިބިފައިވާ ކަމަށްވެސް ބަޔާނުގައި ބުނެފައިވެއެވެ.

Advertisement

މި މަޢުލޫމާތު ހާމަކުރެވުނީ އީރާނާއި އިސްރާއީލާ ދެމެދު ގުޅުން އިންތިހާއަށް ގޯސްވެފައިވާ ދަނޑިވަޅެއްގައެވެ. ހައްޔަރުކުރެވުނު މީހާގެ ނަން ހާމަކޮށްފައި ނުވިޔަސް، އޭނާ ހައްޔަރުކުރެވުނީ މިދިޔަ މަހުގައި ކަމަށް ބަޔާނުގައި ބުނެފައިވެއެވެ. އޭނާގެ އަމާޒުތަކުގެ ތެރޭގައި އިސްރާއީލުގެ ބޮޑުވަޒީރާއި، ދިފާއީ ވަޒީރާއި، އެތެރޭގެ ސަލާމަތީ އޭޖެންސީ ޝިން ބެޓްގެ އިސްވެރިޔާ ހިމެނެއެވެ.

ތަޙުޤީޤުން އެނގިފައިވާ ގޮތުގައި، މި މީހާ ދެފަހަރެއްގެ މަތިން ތުރުކީގެ ސަމަންދަގް އަށް ދަތުރުކޮށް، "އެޑީ" ކިޔާ އީރާނު ވިޔަފާރިވެރިއަކާ ބައްދަލުކޮށްފައިވެއެވެ. އެޑީއަށް އީރާނުން ބޭރަށް ދިއުމަށް ދަތިވުމާ ގުޅިގެން، އިސްރާއީލުގެ މީހާ ދެފަހަރު އީރާނަށް ވަދެފައިވާ ކަމަށް ތަޙުޤީޤުން ހާމަވެފައިވެއެވެ. އީރާނުގައި އޭނާ އެޑީއާއި އީރާނުގެ ސަލާމަތީ އޮފިޝަލަކާ ބައްދަލުކޮށްފައިވާ ކަމަށް ބެލެވެއެވެ.

ތަހުޤީޤު ބަޔާނުގައި ބުނެފައިވާ ގޮތުގައި، އެޑީ އިސްރާއީލުގެ މީހާއަށް އެދިފައިވަނީ "އީރާނުގެ އެކި ސަލާމަތީ މިޝަންތައް" އިސްރާއީލުގައި ކުރިއަށް ގެންދިއުމަށެވެ. މީގެ ތެރޭގައި ފައިސާ ނުވަތަ ބަޑިއެއް ފޮނުވުމާއި، އިސްރާއީލުގެ މީސްކޮޅު ސަރަހައްދުތައް ފޮޓޯނަގައި އީރާނުގެ ފަރާތްތަކަށް ފޮނުވުމާއި، އީރާނުން ރެކްރޫޓްކޮށްފައިވާ އެހެން އިސްރާއީލު ރައްޔިތުންނަށް ބިރުދެއްކުން ހިމެނެއެވެ.

އީރާނަށް ކުރި ދެވަނަ ދަތުރުގައި، އީރާނުގެ އިންޓެލިޖެންސް އޭޖެންޓުން އިސްރާއީލުގެ މީހާއަށް އެދިފައިވަނީ އިސްރާއީލުގައި ޓެރަރިސްޓް ހަރަކާތްތައް ހިންގުމަށެވެ. މީގެ ތެރޭގައި ނެތަންޔާހޫއާއި ދިފާއީ ވަޒީރު ޔޯވް ގަލަންޓް، އަދި ޝިން ބެޓްގެ އިސްވެރިޔާ ރޯނަން ބާރު މެރުން ހިމެނެއެވެ.

މި ހުރިހާ މިޝަންތަކަށް އިސްރާއީލުގެ މީހާ އެޑްވާންސްގެ ގޮތުގައި އެއް މިލިއަން ޑޮލަރު ހޯދުމަށް އެދިފައިވާ ކަމަށް ތަޙުޤީޤުން ދައްކައެވެ. އަދި މިހާތަނަށް އޭނާއަށް 5،000 ޔޫރޯ ލިބިފައިވާ ކަމަށް ބެލެވެއެވެ.

ޝިން ބެޓްގެ އިސް އޮފިޝަލަކު ބުނެފައިވަނީ މި މައްސަލައިން ދައްކުވައިދެނީ އީރާނުގެ އިންޓެލިޖެންސް އޭޖެންޓުން އިސްރާއީލުގެ ރައްޔިތުން ރެކްރޫޓްކޮށް، އިސްރާއީލުގައި ޓެރަރިސްޓް ހަރަކާތްތައް ހިންގުމަށް ކުރާ ބޮޑެތި މަސައްކަތްތައް ކަމަށެވެ.