މޯލްޑިވްސް ސްޓޭޓް ޝިޕިން (އެމްއެސްއެސް)ގެ ދަތުރުތައް އިންޑޮނޭޝިއާއަށް ފަށަން ތައްޔާރު ވެއްޖެއެވެ.

އެމްއެސްއެސްއިން އެކްސްގައި ކުރި ޕޯސްޓެއްގައި ބުނީ، މި ދަތުރުތައް ކުރާނީ އިންޑޮނޭޝިއާގެ ބެލަވަންއިން މެލޭޝިއާގެ ޕޯޓު ކިލާންގް އަދި ސްރީލަންކާގެ ކޮލޮމްބޯއަށް ކަމަށެވެ.

އެމްއެސްއެސްއިން މިހާރު ދަތުރުކުރަމުން ދަނީ މެލޭޝިއާއިން ކޮލަމްބޯއަށް އަދި ކޮލޮމްބޯއިން މާލެއަށް އަދި ދުބާއީން މާލެއަށެވެ.

Advertisement

މި ދަތުރުތަކުގައި ބޭނުންކުރަނީ އެމްއެސްއެސްގެ އަމިއްލަ ބޯޓެވެ. އެއީ އެމްއެސްއެސް ގްރެފީންއެވެ. އެމްއެސްއެސްއިން މެލޭޝިއާއަށް ދަތުރުތައް ފެށީ މިދިޔަ ޖުލައިމަހުގެ ތެރޭގައެވެ.

މުދާތައް ކޮލޮމްބޯއަށް ގެނައުމަށްފަހު ކޮލޮމްބޯއިން މާލެ ދަތުރުކުރާ ބޯޓުތަކުގައި ރާއްޖެއަށް ފަސޭހަކަމާއެކު މުދާ ގެނެވޭނެ ކަމަށް އެ ކުންފުނިން ބުނެއެވެ. މި ރޫޓަށް ބޮޑު ތަރުޙީބެއް އެބައޮތްކަން ފާހަގަކޮށް އެ ކުންފުނީގެ  ޗީފް ކޮމާޝިއަލް އޮފިސަރ ތަހާ މުޙައްމަދު ދައުލަތުގެ މީޑިއާ އާ ވާހަކަދައްކަވަމުން ބުނެފައިވަނީ، މިހާރުވެސް ފުރަތަމަ ދަތުރުގެ %70 ފުރިފައިވާކަމަށެވެ.

އެމްއެސްއެސްގެ ފްލީޓުގައި ފަސް ބޯޓު އޮވެއެވެ. އެ ކުންފުނިން މާލެ އިން އައްޑޫ ސިޓީއަށްވެސް ޝެޑިއުލްކޮށް ދަތުރުތައް ކުރެއެވެ.