ރާއްޖެ އާއި އިންޑިއާ އާ ދެޤައުމުގެ ދެމެދުގައި އޮތް ވިޔަފާރީގެ ގުޅުން އިތުރަށް ފުޅާކުރުމަށް މަޝްވަރާކުރައްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އަވައްޓެރި އިންޑިއާއަށް މިއަދު ފެއްޓެވި ދަތުރުފުޅުގައި ނިއުދިއްލީގައި ދިރިއުޅޭ ދިވެހިންނާއެކު ބޭއްވި ބައްދަލުވުމުގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، އިންޑިއާއަށް ކުރައްވާ ދަތުރުފުޅުގައި، ދެ ޤައުމުގެ ދެމެދުގައި އެކި ދާއިރާތަކުން ގުޅުން ބަދަހިކޮށް ފުޅާކުރުމަށް މަޝްވަރާކުރުމަށް ނިންމާފައިވާކަމަށެވެ.

ދިއްލީގެ އައިސީޓީ މޯރިއާ ހޮޓެލްގައި ދިވެހިންނާ ދެއްކެވި ވާހަކަފުޅުގައި ރައީސް ވިދާޅުވީ، ޓޫރިޒަމާއި ދަތުރުފަތުރުކުރުމުގެ ދާއިރާ ފަދަ މުހިއްމު ދާއިރާތަކުން އިންޑިއާގެ ވިޔަފާރިތަކާއެކު އޮންނަ ގުޅުން އިތުރަށް ވަރުގަދަކުރުމަށް ނިއުދިއްލީއަކީ މުހިއްމު ތަނެއްކަމަށެވެ.

Advertisement

ރައީސް ޑރ.މުއިއްޒު، ނިއުދިއްލީގައި ދިވެހިންނާއެކު ބޭއްވި ބައްދަލުވުމުގެ ތެރެއިން..

ރައީސް ޑރ.މުއިއްޒު ވިދާޅުވީ އެމަނިކުފާނުގެ ހާރިޖީ ސިޔާސަތަކީ ރާއްޖޭގައި އުޅޭ ރައްޔިތުންނާއި، ރާއްޖެއިން ބޭރުގައި ދިރިއުޅޭ ރައްޔިތުންނަށް އަދި ކޮންމެ ޤައުމެއްގައި އުޅުނު ނަމަވެސް އެ ރައްޔިތަކަށް ބޭނުންވާ ހިދުމަތްތައް ވީ އެންމެ ފުރިހަމަޔަށް ލިބިދިނުންކަމަށެވެ. 

ރައީސް ޑރ.މުއިއްޒު، ނިއުދިއްލީގައި ދިވެހިންނާއެކު ބޭއްވި ބައްދަލުވުމުގެ ތެރެއިން..

މިގޮތުން ކުރައްވާ ދަތުރުތަކުގައި ދިވެހިންނާއި ބައްދަލުކޮށް ހުރި ދަތިތައް އޮޅުންފިލުވައި އެކަންކަން ހައްލުކުރުމަކީ އެމަނިކުފާނު ހާއްސަ އިސްކަމެއްދެއްވާ ކަމެއްކަމަށްވެސް ރައީސް ވިދާޅުވިއެވެ.

ރައީސުލްޖުމްހޫރިއްޔާ ޑރ.މުއިއްޒު އިންޑިއާއަށް މި ވަޑައިގެންނެވީ، އެޤައުމުގެ ރައީސް ދުރޫޕަތީ މުރުމޫގެ ރަސްމީ ދައުވަތަކަށެވެ. ރަައީސުލްޖުމްހޫރިއްޔާ ޑރ.މުއިއްޒުގެ މި ދަތުރުފުޅުގައި އެމަނިކުފާނުގެ އަރިހުގައި ކެބިނެޓްގައި ހިމެނިވަޑައިގަންނަވާ ވަޒީރުންވެސް ބައިވެރިވެ ވަޑައިގެންނެވިއެވެ. 

ރައީސް އިންޑިއާ ދަތުރުފުޅުގެ ތެރެއިން އިންޑިއާ ސަރުކާރާއެކު ބޭއްވުމަށް ހަމަޖެހިފައިވާ ރަސްމީ ބައްދަލުވުންތައް ފެށުމަށް ހަމަޖެހިފައިވަނީ މާދަމައިން ފެށިގެންނެވެ.