އިންޑިއާގަައި ބޭއްވި އިންވެސްޓްމަންޓް ފޯރަމްގެ ނަތީޖާ ދާދިއަވަހަށް ފެނިގެން ދާނޭކަމަށް، ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.

ރައީސުލްޖުމްހޫރިއްޔާ އަވައްޓެރި އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގައި ވެރިރަށް ނިއުދިއްލީގައި އިއްޔެ ވަނީ މޯލްޑިވްސް އިންވެސްޓްމަންޓް ފޯރަމް ނަމުގައި ފޯރަމެއް ބޭއްވާފައެވެ. އަދި މިއަދު މުމްބާއީގައިވެސް ވަނީ ޓޫރިޒަމް ސިނާއަތަށް ހާއްސަކޮށް ފޯރަމެއް ކުރިއަށްގެންގޮސފައެވެ. މީގެ ތެރެއިން ނިއުދިއްްްލީގައި ބޭއްވި ފޯރަމް ކުރިއަށްގެންދިޔައީ އިންޑިއާގެ އެކިދާއިރާތަކުގެ ވިޔަފާރިވެރިންނަށް ދައުވަތު ދެވިގެންނެވެ.

ރައީސްގެ އިންޑިއާ ދަތުރުފުޅާ ގުޅޭގޮތުން މީޑިއާތަކާ ވާހަކަދައްކަވަމުން ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވީ، އިންޑިއާގައި ބޭއްވުނު އިންވެސްޓަރ ފޯރަމްތައް ކުރިއަށްގެންގޮސްފައިވަނީ ރައީސުލްޖުމްހޫރިއްޔާގެ ވައުދުތަކަށް ބަލައިގެން އެކަންކަން ހާސިލްވާގޮތަށް ކަމަށެވެ. 

މިނިސްޓަރު ވިދާޅުވީ އިންޑިއާގައި ބޭއްވި އިންވެސްޓްމަންޓް ފޯރަމްގައި ވަރަށް ވަރުގަަދަ އިންވެސްޓަރުން ބައިވެރިވި ކަމަށާއި، އޭގެ ތެރެއިން ބައެއް ވިޔަފާރިވެރިން ރާއްޖެ ދިއުމަށް ހަމަޖެހިފައިވާކަމަށެވެ.

ރައީސްގެ މި ދަތުރުފުޅާ ގުޅިގެން ރާއްޖެއަށް ވަރަށްގިނަ ފުރުސަތުތަކެއް ފަހިވެގެންދާނޭކަން ފާހަގަކުރައްވަމުން ފައިސަލް ވިދާޅުވީ، ހަނިމާދޫ އެއާޕޯޓްގެ މަސަައްކަތް ނިމިގެންދާއިރު، މި އިންްްވެސްޓްމަންޓް ފޯރަމްގެ ތެރެއިން އެހިސާބުގައި ޓޫރިޒަމަށް ތަރައްޤީ ރިސޯޓްތައް ހެދުމަށް އިންވެސްޓަރުން ހޯދިގެންދާނޭކަމަށެވެ.

ފައިސަލް ވިދާޅުވީ މިފަހަރު އިންޑިއާގައި ބޭއްވި ފޯރަމްތަކުގެ ނަތީޖާ ދާދި އަވަހަށް ފެނިގެންދާނޭކަމަށާއި، އެކަމަށް ސަރުކާރުން މިހާރުވެސް ބުރަ މަސައްކަތްތަކެއްވެސް ކުރަމުންދާކަމަށެވެ.

ނިއުދިއްލީގައި ބޭއްވި މޯލްޑިވްސް އިންވެސްޓްމަންޓް ފޯރަމްގައި ތަގުރީރުކުރައްްވަމުން ރައީސް ޑރ.މުއިއްޒު ވަނީ ރާއްޖޭގައި ފަތުރުވެރިކަމުގެ އިތުރުން، މާލީ ޚިދުމަތްތަކާއި، މެރިޓައިމް ސިނާޢަތާއި، ޑިޖިޓަލް އިޤްތިޞާދު ފަދަ ދާއިރާތައް ހިމެނޭ ގޮތަށް އިޤްތިޞާދު ސިންދަފާތުކުރުމަށް އަދުގެ ސަރުކާރުން ގިނަ މަސައްކަތްތަކެއް ކުރަމުން ގެންދާކަމަށް ވިދާޅުވެފައެވެ.