ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޚިޔާނާތުގެ މައްސަލައިގައި ތުހުމަތުކުރެުކުރެވޭ އެ އެސޯސިއޭޝަންގެ ކުރީގެ ރައީސް ބައްސާމް އަދީލް ޖަލީލް (ގ. ފަހިވާގެ / މާލެ) ގެ މިލްކިއްޔާތުގައިވާ ހުޅުމާލޭ އަމީން އެވެނިއުގެ 2 އެޕާޓްމަންޓް ފުލުހުންނާ ހަވާލުކޮށްފިއެވެ. 

ކޯޓު އަމުރަކާ ގުޅިގެން މި ދެ އެޕާޓްމަންޓް 2024 އޮކްޓޯބަރ 6 ވަނަ ދުވަހުގެ ކުރިން ފުލުހުންނާ ހަވާލުކުރުމަށް 2024 ސެޕްޓެމްބަރ 28 ވަނަ ދުވަހު ކޯޓުން ވަނީ އަމުރުކޮށްފައެވެ. ނަމަވެސް، ބައްސާމްގެ ވަކީލުން އެޕާޓްމަންޓްތައް ހަވާލުކުރުމަށް 2024 އޮކްޓޯބަރ 31 ވަނަ ދުވަހާ ހަމައަށް މުއްދަތު ދިނުމަށް އެދުމުން ކުރިން ފުލުހުން ވަނީ އެ މުއްދަތު ދިން ކަމަށް ބުނެފައެވެ. 

އެއާއެކު ގިނަ ބައެެއްގެ ފާޑުކިޔުންތައް އަމާޒުވެގެން ދިޔުމުން، މި ހޯމަ ދުވަހުގެރޭ ފުލުހުންވަނީ ބަޔާނެއް ނެރެ، އޮކްޓޯބަރ 8 ގެ 00:00ގެ ކުރިން އެޕާޓްމަންޓްތައް ހަވާލުކުރުމަށް އަންގާފައުވާނެކަން ހާމަކޮށްފައެވެ. 

Advertisement

އެ މުހުލަތު ރޭ ހަމަވީއިރު، ފުލުހުން ރޭ ބުނީ، އެ ދެ އެޕާޓްމަންޓްވެސް ފުލުހުންނާ ހަވާލު ކޮށްފައިވާ ކަމަށެވެ. 

ފުލުހުން މީގެ ކުރިން ބުނެފައިވާ ގޮތުން، ކޮވިޑްގެ ހާލަތުގައި ފީފާ މެދުވެރިކޮށް އެފްއޭއެމުން ނެގި ލޯނުގެ ފައިސާއިން އޭރު އެފްއޭއެމްގެ ރައީސް ކަމުގައި ހުރި ބައްސާމް, ހުޅުމާލޭގައި ހުންނަ އަމީން އެވެނިއު އިން 2 އެޕާޓްމަންޓް ވަނީ ގަނެފައެވެ.

އެގޮތުން އެކަމަށް އެފްއޭއެމްގެ 3 މިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަމަށް ފުލުހުން ބުނެފައިވެއެވެ. އަދި މި ފައިސާ އަކީ އެފްއޭއެމުން ޑޮލަރު މާރުކުރުމުގެ ނަމުގައި އެކި ކުންފުނިތަކަށް ދޫކޮށްފައިވާ ޑޮލަރަށް، ލިބުނު ދިވެހި ރުފިޔާ ކަމަށްވެސް އެނގިފައިވާ ކަމަށް ބުންޏެވެ.

މީގެ އިތުރުން އެފްއޭއެމުން އަމީން ކޮންސްޓްރަކްޝަންސްއަށް އޭޕްރީލް 14، 2021 ގައި އެއް މިލިއަން ޑޮލަރު ޖަމާކުރިކަން ވެސް ފާހަގަކުރެވިފައިވާ ކަމަށް ފުލުހުން ބުނެފައިވެއެވެ. އަދި މިއީ ކޮވިޑު ރިލީފް ލޯނެއްގެ ގޮތުގައި ފީފާ އިން އެފްއޭއެމް އަށް ދޫކޮށްފައިވާ 1.9 މިލިއަން ޑޮލަރުގެ ތެރެއިން ބައެއް ކަމަށްވެސް ބުނެފައިވެއެވެ. 

މީގެ އިތުރުން މި ޑޮލަރަށްވާ ފައިސާ އެފްއޭއެމްއަށް ލިބިފައި ނުވާ ކަމަށާއި, މި ފައިސާ އެފްއޭއެމްްއަށް ލިބުނުކަން ދެއްކުމަށް ލިޔެކިޔުމެއްވެސް ތައްޔާރުކޮށްފައިވާ ކަމަށް ފުލުހުން ވަނީ ބުނެފައެވެ.