ހިލޭ އަންހެނުންނާއި ފިރިހެނުން އެކަހެރިވެ ގާތްގޯޅިވުމަކީ ފާފައަކަށް މަގުފަހިވެދާނެ ކަމެއް ކަމަށާ، ވުމާއެކު އެފަދަ ގޮތަށް ޑިޔުޓީ ހަމަޖެއްސުމަކީ ފާފަވެރިވާނެ ކަމެއް ކަމަށް ދީނީ ޢިލްމުވެރިޔާ އައްޝެއިޚް ޝުޢައިބު ނާޒިމް ވިދާޅުވެއްޖެއެވެ. 

ދާރިސް ޓީވީން ގެނެސްދޭ ޢިލްމީ ޚަޒާނާގެ ރޭގެ އެޕިސޯޑުގައި، މި މައުޟޫއަށް އަލިއަޅުވާ ލައްވައި ވާހަކަ ދައްކަވަމުން ޝެއިޚް ޝުޢައިބު ވަނީ، ރަސޫލާ ޞޢވ ގެ ހަދީޘްފުޅުގެ އަލީގައި، ހިލޭ އަންހެނަކާއި ފިރިހެނަކު އެކަހެރިވުމުގެ ނުރައްކާތެރި ކަމުގެ މައްޗަށް އަލިއަޅުވާލައްވާފައެވެ. 

ޝެއިޚް ވިދާޅުވިގޮތުގައި، ސައިކަލެއް ނުވަތަ ކާރެއްގައި ނަމަވެސް ހިލޭ އަންހެނަކާއި ފިރިހެނަކު އެކަހެރިވެ ޑިޔުޓީ އަދާ ކުރެވޭ ގޮތަށް، ތިބުމާއި، ކައުންޓަރެއް ކައިރީގައި ނަމަވެސް ދެމީހުން އެކަހެރިވެ ޑިޔުޓީ ކުރެވޭގޮތަށް ތިބުންވެސް އެކަހެރިވުމުގެ މާނާގައި ހިމެނޭ ކަމަށެވެ. 

ރޭގެ ޢިލްމީ ޚަޒާނާ ޕްރޮގްރާމުގެ ތެރެއިން: ފޮޓޯ/ ދާރިސް ޓީވީ

”އެހެންކަމުން، އެއީ ( ހިލޭ އަންހެނުންނާ ފިރިހެނުން އެކަހެރިވާ ގޮތަށް ޑިޔުޓީ ހެދުން) ފާފަވެރިވާނެ ކަމެއް. ފާފައަކަށް މަގުފަހިކޮށްދިނުމަކީ އެކަމަކަށް މަގުފަހިކޮށްދޭ މީހަކުވެސް އެކަމުގެ ސަބަބުން ފާފަވެރިވާނެ ކަމެއް ކަމަށް ރަސޫލާ ޞޢވ ގެ ހަދީޘް ބަސްފުޅުތަކުން އެނގޭ. މުންކަރާތަކަށް މަގުފަހި ކުރި މީހާ، އެ މުންކަރާތް ކުރި މީހުންނެކޭ އެއްފަދަވެގެން އެބަދޭ“ ޝެއިޚް ވިދާވިއެވެ.

ކަންމިހެން ހުރުމުން ހިލޭ އަންހެނަކާއި ފިރިހެނަކު އެކަހެރިވެ ވަޒީފާ ނުކުރެވޭ ގޮތަށް ކަންކަން ހަމަޖެއްސެން އޮއްވައި އެނޫން ގޮތަކަށް، ”އިސްލާމް ދީނުގެ މިންގަނޑުތަކާ ޚިލާފަށް“ ކަންކަން ހަމަޖެއްސުމަކީ ކޮށްގެންވާނެ ކަމެއް ނޫން ކަމަށެ ޝެއިޚް ވިދާޅުވިއެވެ.

އެހެންކަމުން، އިސްލާމީ އުސޫލުތަކާއެއްގޮތަށް ކަންކަންބަދަލު ކުރުމަށް ޝެއިޚް ވަނީ މުވައްސަސާތަކުގެ ވެރިންނަށް ނަޞޭޙަތްތެރިވެފައެވެ.