"ލާމަރުކަޒީ ގުޅުން" ނަމުގައި އެމްޑީޕީ އިން ޚާއްސަ ކޮންފަރެންސެއް ބާއްވަން ނިންމައިފިއެވެ.
މިކަން ހާމަކޮށްފައިވަނީ އެމްޑީޕީން އިއްޔެ ބޭއްވި ނޫސްވެރިންގެ ބައްދަލުވުމެއްގައި އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) އެވެ.
އެގޮތުން ބިގޭ ވިދާޅުވީ، މިމަހު 10 ވަނަ ދުވަހުން ފެށިގެން 15 ވަނަ ދުވަހަށް އެމްޑީޕީގެ ޓީމުތައް ބޮޑުތިލަދުންމައްޗަށް ޚާއްސަ ދަތުރެއް ކުރުމަށް ނިންމާފައިވާ ކަމަށެވެ. އެގޮތުން، ށ، ހއ އަދި ހދ އަށް ޒިޔާރަތް ކުރުމަށް ހަމަޖެހިފައިވާއިރު، މި ދަތުރުތަކުގެ ތެރެއިން ލާމަރުކަޒީ ނިޒާމަށް ގެންނަ ބަދަލުތަކާއި، ލާމަރިކަޒީ ނިޒާމްގެ ބާރު ކެނޑެމުންދާތީ އެކަމާއި މެދު މައުލޫމާތު ދިނުމަށް ހަމަޖެހިފައިވާ ކަމަށް އޭނާ ވިދާޅުވިއެވެ.
މި އަދި އެކަމާއި ގުޅޭގޮތުން އެ ތިން އަތޮޅުގެ ކައުންސިލަރުންނާއި ހުރިހާ ސިޓީތަކުގެ މޭޔަރުން ހިމެނޭހެން ކުޅުދުއްފުށީގައި ޚާއްސަ ހަރަކާތެއް ބޭއްވުމަށް ހަމަޖެހިފައިވާ ކަމަށް އޭނާ ވިދާޅުވިއެވެ. މި ކޮންފަރެންސްގައި މި ކުރީގެ ރައީސް އިބްރާޙިމް މުހައްމަދު ޞާލިހު އާއި އެމްޑީޕީގެ ޗެއަރޕަރސަން އާއި އެމްޑީޕީގެ ރައީސް ބައިވެރިވެވަޑައިގަންނަވާނެ ކަމަށް ބިގޭ ވިދާޅުވިއެވެ.
މީގެ އިތުރުން އިއްޔެގެ ބައްދަލުވުމުގައި ވާހަކަ ދައްކަވަމުން ހުޅުމާލެ ދާއިރާގެ ކުރީގެ މެމްބަރު އަދި އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒް ވިދާޅުވިގޮތުގައި، މި ކޮންފަރެންސާއި އެކު އެޕާޓީ އާއި ކައުންސިލްތަކާއި ގުޅުން ރަނގަޅުވާނެ ކަމަށް އުންމީދުކުރެވެއެވެ.
އަދި މިއީ ސިލްސިލާ ކޮންފަރެންސްތަކެއް ކަމަށް ވެސް ނިޔާޒް ފާހަގަކުރެއްވިއެވެ.
މީގެ އިތުރުން މި ދަތުރުގެ ތެރެއިން ޕާޓީ ހިންގުމާއި މެދު އާއްމުންގެ ޚިޔާލު ހޯދުމަށް މަޝްވަރާކުރާނެ ކަމަށްވެސް ބިގޭ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
