އިޒްރާއީލުގެ ހައްދުފަހަނަ އަޅާފައިވާ ނިރުބަވެރި ސިފައިން ގައްޒާއަށް ދިން ބަޑީގެ ހަމަލާތަކެއްގައި އަލް ޖަޒީރާގެ ކެމެރާމަނެއް ޒަހަމްވެއްޖެއެވެ.

މިކަން އަލް ޖަޒީރާއިންވެސް ވަނީ ކަށަވަރުކޮށްދީފައެވެ. އަލް ޖަޒީރާއިން ބުނީ، ނިރުބަވެރިން ގައްޒާގެ އުތުރަށް ދިން ބަޑީގެ ހަމަލާތަކުގައި އަލް ޖަޒީރާގެ ފާދީ އަލް ވަހީދީ ވަރަށްބޮޑަށް ޒަހަމްވެފައިވާކަމަށެވެ. ކެމެރާމަން ގަޔަށް ވަޒަން އަރާފައިވަނީ ސްނިޕަރަކުދިން ހަމަލާއަކުންކަމަށް އަލް ޖަޒީރާއިން ވަނީ ތުހުމަތުކޮށްފައެވެ.

މިކަމާ ގުޅިގެން އިޒްރާއީލުން އަދި ވަކި އެއްޗެއް ބުނެފައެއް ނުވެއެވެ. 

Advertisement

ނިރުބަވެރިން މިހާރު ދަނީ ޖަބަލިއާ ރެފިއުޖީ ކޭމްޕަށް ވަދެ އޮޕަރޭޝަނެއް ހިންގަމުންނެވެ. އެ އޮޕަރޭޝަނުގައި ގޮތެއްފޮތެއް ނުބަލައި ބައެއް މީހުންނަށް ހަމަލާތައް ދެމުންދާކަމަށް އަލްޖަޒީރާއިން ބުނެއެވެ.

ނިރުބަވެރިންގެ މިފަހުން ފަލަސްތީނުގެ ރައްޔިތުންނަށް ދެމުންދާ ހަމަލާތައް ވަރުގަދަކޮށްފައިމިވަނީ، ހިޒްބުﷲ އިން ނިރުބަވެރިންނަށް ދޭ ހަމަލާތައް ވަރުގަދަ ކޮށްފައިވަނިކޮށްކަމަށް މެދުއިރުމަތީގެ މަޝްރަހު ދިރާސާކުރާ ފަރާތްތަކުން ބުނެއެވެ.

ނިރުބަވެރިން ފަލަސްތީނުގެ ރައްޔިތުންނާ ދެކޮޅަށް މިފަހުން ފެށި ހަނގުރާމައިގެ ޖަރީމާތަކަށް އަހަރެއް ވެފައިވާއިރު، 42,000 މީހުން ވަނީ ޝަހީދުކޮށްލާފައެވެ. މީގެ ތެރޭގައި 16،756 ކުޑަކުދިން ހިމެނޭއިރު، އަންހެނުންގެ އަދަދަކީ 11،346 އެވެ.