އިންޑިއާގެ އެންމެ ބޮޑެތި މަހުޖަނުންގެ ތެރޭގައި ހިމެނޭ ޓާޓާ ސަންސް އަދި ޓާޓާ ގްރޫޕްގެ ކުރީގެ ޗެއާމަން ރަޓަން ޓާޓާ އަވަހާރަވެއްޖެއެވެ.
ރަޓަން ޓާޓާ އަވަހާރަވީ މިރޭގެ ވަގުތެއްގައި އިންޑިއާގެ މުމްބާއީގެ ހޮސްޕިޓަލެއްގައި އެޑްމިޓްކޮށް ފަރުވާ ހޯއްދަވަމުން ދަނިކޮށް ހާލު ދެރަވެގެންނެވެ. ރަޓަން އަވަހާރަވިއިރު އުމުރުފުޅަކީ 86 އަހަރެވެ. ފަހަކަށް އައިސް ސިއްހީގޮތުން ކުރިމަތިވި މައްސަލަތަކުގެ ސަބަބުން ރަޓަން ގެންދެވީ ހޮސްޕިޓަލުން ފަރުވާ ހޯއްދަވަމުންނެވެ.
މީގެ ކުރިންވެސް ރަޓަން ވަނީ އެކި ފަހަރުމަތިން ހޮސްޕިޓަލުގައި އެޑްމިޓްވެ އޮންނަވައިގެން ފަރުވާގެ ކަންކަން ކުރިއަށްގެންގޮސްފައެވެ. ރަޓަން ޓާޓާ އަވަހާރަވުމާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ އެކްސްގައި ކުރެއްވި ޕޯސްޓެއްގައި ވިދާޅުވީ، ރަޓަން ޓާޓާއަކީ ދުރުވިސްނޭ ވިޔަފާރިވެރިއެއްގެ އިތުރުން އިންސާނިއްޔަތަށް ހޭދަކުރުމުގައި އާދަޔާ ހިލާފް އިންސާނެއް ކަމަށެވެ. މުޖުތަމައުގެ ދިރިއުޅުމުގެ ހާލަތު ރަނގަޅުކުރުމަށް ކުރެއްވި މަސައްކަތްތަކުގެ ސަބަބުން ގިނަ ބައެއްގެ ލޯބި ލިބުނު ޝަހްސިއްޔަތެއް ކަމަށް މޯދީގެ އެކްސްގައި ވަނީ ވިދާޅުވެފައެވެ.
ޓާޓާ ކުންފުންޏަކީ މިވަގުތު އިންޑިއާގެ ދެވަނައަށް އެންމެބޮޑު ކުންފުންޏެވެ. ޓާޓާ ކުންފުނީގެ އަގު 183 ބިލިއަން ޑޮލަރަށްވުރެ މައްޗަށް އަރައެވެ. އުމުރުން ދުވަސްވުމާއެކު ޓާޓާ ގްރޫޕްގެ ޗެއާމަންކަމުން ރަޓަން ވަކިވީ 2012 ވަނަ އަހަރުގެ ތެރޭގައެވެ.
ޓާޓާއިން އަންނަނީ ތަފާތު ދާއިރާތަކުގައި އިންވެސްޓްކޮށް ވިޔަފާރުކުރަމުންނެވެ. މީގެ ތެރޭގައި އޮޓޯމޯޓިވް އިންޑަސްޓްރީ، އެއާލައިނާއި އެރޯސްޕޭސްގެ އިތުރުން ރިއަލް އެސްޓޭޓް އަދި ޓެލެކޮމިއުނިކޭޝަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
