އިޒްރާއީލުގެ ހައްދުފަހަނަ އަޅާފައިވާ ނިރުބަވެރި ސިފައިން ލުބުނާން ދެމުންގެންދާ ހަމަލާތަކުގައި، އެގައުމުގައި ހަރަކާތްތެރިވާ އދ ގެ ސުލްހަ ބަލަހައްޓާ ފައުޖަށް ހަމަލާތަކެއް ދީފިއެވެ.
މިކަމާ ގުޅިގެން އަލްޖަޒީރާއިން ބުނީ، ނިރުބަވެރިން ލުބުނާނުގެ ހިޒްބުﷲ އަށް ދިން ހަމަލާތަކެއްގައި އޮޅުންތަކެއް އަރައިގެން އދ ގެ ސުލްހަ ބަލަހައްޓާ ސިފައިންގެ ބަޔަކަށް ޓޭންކަރުން ހަމަލާދީފައިވާކަމަށެވެ. މި ހަމަލާތަކުގައި އދ ގެ ފައުޖަށް ނިސްބަތްވާ 2 ސިފައިންގެ މީހަކު ވަނީ ޒަހަމްވެފައެވެ.
މިކަމާ ގުޅޭގޮތުން އދ ގެ ފައުޖުން ބުނެފައިވަނީ، މިއީ ނިރުބަވެރިން ސީދާ ގަސްތުގައި ދިން ހަމަލާތަކެއް ކަމަށާއި، ހަމަލާތަކުގައި ވެހިކަލްތަކުގައި ހުރި ކެމެރާތައްވެސް ހަލާކުކޮށްލާފައިވާކަމަށެވެ. މިކަމާ ގުޅިގެން އަދި މިހާތަނަށް އިޒްރާއީލުން ވަކިއެއްޗެއް ބުނެފައެއް ނުވެއެވެ.
ނިރުބަވެރިން ގައްޒާއަށް ދެމުންދާ ހަމަލާތަކުގައި މިއަދުވެސް ވަނީ ގައްޒާގެ ސްކޫލަކަށް ހަމަލާދީފައެވެ. މި ހަމަލާދިންއިރު މި ސްކޫލް ބޭނުންކުރަނީ ހަނގުރާމައިގައި ގެދޮރުގެއްލޭ މީހުންގެ ބޯހިޔާވަހިކަމުގެ ބޭނުމަށެވެ. މި ހަމަލާތަކުގައި 28 މީހަކު ޝަހީދުކޮށްލާފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.
Advertisement
This content is created and paid for by advertisers and does not involve Voice Journalists
