އެމްޑީޕީގެ ފަރާތުން ބޭއްވުމަށް ނިންމި "ލާމަރުކަޒީ ގުޅުން" ކޮންފަރަންސް ފަށައިފިއެވެ.

ލާމަރުކަޒީ ކޮންފަރަންސް ފަށާފައިވަނީ މިއަދު ހެނދުނު ކުޅުދުއްފުށީ ސިޓީގައެވެ. އަންނަ އަންގާރަދުވަހުގެ ނިޔަލަށް ކުރިއަށްދާ މި ކޮންފަރަންސް އެކި ރަށްތަކުގައި ބޭއްވުމަށް ވަނީ ހަމަޖެހިފައެވެ. މި ކޮންފަރަންސްސަކީ މި ސަރުކާރުން، ލާމަރުކަޒީ ބާރުތައް ކަނޑުވާލަމުންދާތީ އެމްޑީޕީން ކުރިއަށްގެންދާ ކޮންފަރެންސެކެވެ.

މި ކޮންފަރެންސްގައި އެމްޑީޕީއަށް ނިސްބަތްވާ އެޕާޓީގެ އިސް ފަރާތްތަކުން ބައިވެރިވާއިރު، މި ކޮންފަރެންސްގެ ތެރެއިން ޕާޓީގެ މެމްބަރުންނަށް އަމާޒުކޮށްގެން ގިނަ ހަރަކާތްތަކެއް ކުރިއަށްދާނޭކަމަށް އެމްޑީޕީން ބުނެއެވެ.

Advertisement

ލާމަރުކަޒީ ކޮންފަރެންސް އާ ގުޅޭގޮތުން އެންމެފަހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒް ވިދާޅުވެފައި ވަނީ، އެމްޑީޕީގެ ސިޔާސަތަކީ ލާމަރުކަޒީ ނިޒާމުގެ ތެރެއިން ރާއްޖެ ތަރައްޤީކުރުން ކަމަށެވެ. އެއްތަނަކަށް މީހުން ޖަމާކޮށް ރާއްޖެ ތަރައްޤީކުރުމަކީ އެމްޑީޕީން ތާއީދުކުރާނޭ ސިޔާސަތެއް ނޫންކަމަށްވެސް އޭނާ ވިދާޅުވިއެވެ.

އެނާ ވަނީ މިވީ ދުވަސްތަކުގައި އެމްޑީޕީއާ ޕާޓީގެ މެމްބަރުންނާ އޮންނަގުޅުން އެންމެ ރަނގަޅަށް ބޭއްވިފައި ނުވާކަން ފާހަގަކުރައްވައި،  މިކޮންފަރެންސްގެ ސަބަބުން އެގުޅުން ރަނގަޅުވެގެން ދާނޭކަމަށް އުއްމީދުކުރާކަމަށް ވިދާޅުވެފައެވެ.

އެމްޑީޕީން ވަނީ މި ދަތުރުގައި ބޮޑުތިލަދުންމަތީގެ ށ، ހއ، ހދ އަތޮޅުގެ ރަށްތަކަށް ދިއުމަށް ނިންމާފައެވެ.