އިންޑިއާގެ ޔަތީމުޚާނާއެއްގައި ތިއްބާ ނެދަލޭންޑްސްގެ ދެ އާއިލާއަކުން އެޑޮޕްޓްކުރި ދެ އަންހެން ކުއްޖަކީ، އެކަކު އަނެކަކަށް ނޭނގި އުޅެމުންދިޔަ އެއްބަނޑު އެއްބަފާ ދެބެއިންކަން 40 އަހަރު ފަހުން ޑީއެންއޭ ޓެސްޓަކުން ކަށަވަރުވެއްޖެއެވެ.

މީނާ ގެލްޓިންކް (43 އަހަރު) އަދި މިނާލް ޓިޖްސަން (44 އަހަރު) އަކީ ތުއްތުއިރު އިންޑިއާގެ ޔަތީމުޚާނާއަކަށް ދޫކޮށްލާފައި ތިއްބާ، ނެދަލޭންޑްސްގެ ދެ އާއިލާއަކުން ބަލައިގަނެގެން އެ ގައުމުގައި ބޮޑުވި ދެމީހުންނެވެ. އެމީހުން ބޮޑުވަމުން އައީ އެކަކު އަނެކަކާ މާ ދުރު ނޫން ސަރަހައްދުތަކެއްގައެވެ.

މި ދެމީހުންނަށް އެންމެ ފުރަތަމަ ބައްދަލުވީ 1996 ވަނަ އަހަރު، އެޑޮޕްޓްކޮށްފައިވާ ކުދިންނަށް ބޭއްވި ހަރަކާތެއްގެ ތެރެއިންނެވެ. އެ ދުވަސްވަރު އެމީހުން ދިރިއުޅެމުން ދިޔައީ އެންމެ 130 ކިލޯމީޓަރު ދުރުގައެވެ. ފުރަތަމަ ބައްދަލުވުމުންވެސް ދެމީހުންގެ މެދުގައި ވަރުގަދަ ގުޅުމެއް އުފެދުނު އިރު، އެމީހުންގެ ސިފަ އެއްގޮތްކަމުން އެކުވެރިންވެސް އޭރު ހައިރާންވިއެވެ. އެ ދުވަސްވަރު ސަމާސާއަކަށް އެކަކު އަނެކަކަށް "ސިސް"ގެ ނަމުން މުޚާތަބުކޮށް ސިޓީ ބަދަލުކޮށް އުޅުނު ނަމަވެސް، ފަހުން 15 އަހަރު ވަންދެން އެކަކު އަނެކަކާ ގުޅުން ކެނޑިފައި އޮތެވެ.

މީނާއާއި މިނާލް

އެފަހުން މިދިޔަ އޭޕްރީލް މަހު "މައިހެރިޓޭޖް ޑީއެންއޭ" މެދުވެރިކޮށް ހެދި ޓެސްޓަކުން ދެއްކި ގޮތުގައި މި ދެމީހުންގެ ޑީއެންއޭ 100 އިންސައްތަ ދިމާވެއެވެ.

ފްރާންސްގައި ދިރިއުޅޭ މިނާލް ބުނީ، އޭނާ ބޮޑުވީ އާއިލީ ލޯތްބާއެކު ކަމުގައި ވިޔަސް، އަބަދުވެސް ހިތުގެ ކޮންމެވެސް ކަނެއްގައި ފޫނުބެއްދޭ ފަދަ އެކަނިވެރިކަމެއް އިހުސާސް ކުރެވޭ ކަމަށެވެ. އަދި ޑީއެންއޭ ނަތީޖާ ލިބުމުން، އެއީ ކުރިން ބައްދަލުވި އެކުވެރިޔާކަން އެނގުމުން ގަބޫލުކުރަން ދަތިވި ކަމަށް އޭނާ ބުންޏެވެ.

މީނާ ބުނި ގޮތުގައި، މި ހަގީގަތް އެނގުމަކީ އޭނާގެ ހިތުގައި އުފެދިފައިވާ ހުސްކަން ފުރިގެން ދިޔަ ކަމެކެވެ.

މިހާރު މި ދެބެއިން ކޮންމެ ދުވަހަކު ގަޑިއިރުތަކެއް ވަންދެން ވާހަކަދައްކައި، މެސެޖު ކުރެއެވެ.

"އަހަރެމެންނަކީ ދެބެއިންކަން އެނގުމުގެ ކުރިންވެސް އަހަރެމެންނަކީ އެކުވެރިން. އަސްލު މުޅި އުމުރުގައިވެސް އަހަރެމެންނަކީ ދެބެއިން، އެކަމަކު އެކަން ކުރިން ނޭނގުނީ،" މިނާލް ބުންޏެވެ.