ސުކޫލުތަކުގެ ފާހާނަތައް ހަޑި ކަމާއި ބައެއް ކުލާސް ރޫމްތަކުގެ ޑެސްކުތަކުގައި ހުތުރު އެއްޗެހި ލިޔެފައި ހުންނާތީ އެކަމުގެ ޝަކުވާ ރައީސުލްޖުމްހޫރިއްޔާ ޑރ. މުހައްމަދު މުޢިއްޒަށް ހުށައަޅައިފި އެވެ.
ރައީސްއާ ބައްދަލުކުރަން ބޭނުންވާ މީހުންނަށް ފުރުސަތު ފަހިކޮށްދީ "ރައްޔިތުންގެ އަޑު" ނަމުގައި ވަނީ ހާއްސަ ސިލްސިލާއެއް ފަށާފަ އެވެ. މި ސިލްސިލާގައި ރައީސްއާ ވަކީން ބައްދަލުކުރަން ރައްޔިތުންނަށް ފުރުސަތު ދެ އެވެ.
ފުރަތަމަ ޕްރަގްރާމުން ފުރުސަތު ލިބުނު އަންހެނަކު ވަނީ އޭނާގެ ދަރިފުޅުދާ ސުކޫލުގެ ފާހާނާތައް ހަޑިކަމުގައި ފާހަގަކޮށްފަ އެވެ. އެއީ ސަރުކާރުގެ ސުކޫލެކެވެ. ފާހާނަތައް ހަޑިވުމުން ސުކޫލު ވަގުތު ފާހާނާއަށް ދާން ޖެހުނަސް ކުދީން ނުދާކަމަށް ވަނީ ބުނެފަ އެވެ. އެކަމުން ސިއްހީ މައްސަލަތަކެއް ކުރިމަތިވެދާނެތީ އެކަމުގެ ކަންބޮޑުވުން އޭނާ ފާޅުކުރި އެވެ.
އަދި ބުނީ ބައެއް ކުލާސް ރޫމްތަކުގެ ޑެސްކުތަކުގައި ހުތުރު އެއްޗެހި ލިޔެފައި ހުންނަ ކަމަށެވެ. ބައެއް ކުލާސް ރޫމްތަކަކީ އެއް ދަންފަޅީގައި މަތީ ގުރޭޑްތަކުގެ ދަރިވަރުން ބޭނުންކުރާ އަދި އަނެއް ދަންފަޅީގައި ދަށް ގުރޭޑްތަކުގެ ދަރިވަރުން ބޭނުންކުރާ ތަންތަން ކަމަށާ މަތީ ގުރޭޑްތަކުގެ ދަރިވަރުން ޑެސްކުތަކުގައި ހުތުރު އެއްޗެހި ކުރަހާ ލިޔެ ހަދާފައި ހުންނަ ކަމަށެވެ. އެ ވާހަކަ ކުދީން, ގެއަށް އައިސް ބުނާ ކަމަށާ އެއީ ކަންބޮޑުވާ ކަމެއް ކަމަށް ވެސް އޭނާ ބުންޏެވެ.
ރައީސް ވަނީ އެކަންކަން އެހެން ވެގެން ނުވާނެކަން ފާހަގަކޮށް އެ މައްސަލަތައް ހައްލު ކުރެއްވުމަށް މަސައްކަތް ކުރައްވާނެ ކަމުގައި ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
