ސަރުކާރާއި ރައްޔިތުންގެ ކުންފުނި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން އެކުންފުނީގެ ސައިޓްތަކުގައި މަސައްކަތްކުރާ ސުޕަވައިޒަރުންނަށް ހާއްސަކޮށްގެން ކުރިއަށްގެންދިޔަ މަހާސިންތާ ކާމިޔާބުކަމާއެކު ނިންމާލައިފިއެވެ.

އެމްޓީސީސީގެ އެޗްއާރު ޑިޕާޓްމަންޓުން ކުރިއަށްގެންދިޔަ މިފަހަރުގެ މަހާސިންތާގައި 107 ސައިޓް ސުޕަވައިޒަރުން ވަނީ ބައިވެރިވެފައެވެ. މަހާސިންތާ ކުރިއަށްގެންދިޔައީ ރާއްޖޭގެ އެކި ކަންކޮޅުތަކުގައި މަސައްކަތްކުރާ ސައިޓް ސުޕަވައިޒަރުން ބައިވެރިވުމާއެކުގައެވެ.

ސުޕަވައިޒަރުންގެ މަހާސިންތާ ދެ ދުވަހުގެ ނިޔަލަށް ކުރިއަށްދިޔައިރު، މި މަހާސިންތާގައި ސުޕަވައިޒަރުންނަށް މަސައްކަތުގެ މައިދާނުގައި ހުރި ގޮންޖެހުންތަކާއި، އެކަންކަން ހައްލުކުރުމަށް އެޅިދާނެ ފިޔަވަޅުތަކާބެހޭގޮތުން ވަނީ ސުޕަވައިޒަރުންނަށް މައުލޫމާތުދީފައެވެ.

މަހާސިންތާގައި ސުޕަވައިޒަރުންނަށް ކަމާބެހޭ މައުލޫމާތުތައް ދީފައިވަނީ، އެމްޓީސީސީއަށް ނިސްބަތްވާ ދިވެހި މުއައްޒަފުންނެވެ. މިގޮތުން އެމްޓީސީސީގެ އެކިއެކި ޑިވިޝަންތަކަށް ނިސްބަތްވާ ވެރިންނާއި ފަންނުވެރިން ވަނީ ސެޝަންތައް ނަގައިދެއްވާފައެވެ.

މިގޮތުންމި މަހާސިންތާގައި އެފަރާތްތަކުން ވަނީ މަޝްރޫޢުތައް ކުރިއަށްގެންދިމާ ގުޅޭގޮތުންނާއި، ލީޑަރޝިޕް އަދި ޓީމެއްގެ ގޮތުގައި ގުޅިގެން މަސައްކަތް ކުރުމާއި ގުޅޭގޮތުން ސެޝަންތައް ނަގައިދީފައެވެ.

އެމްޓީސީސީން ސުޕަވައިޒަރުންނަށް ބޭއްވި މަހާސީންތާ ނިންމުމުގެ ހަފްލާ.. ފޮޓޯ/ އެމްޓީސީސީ

މަހާސިންތާ ނިންމުމުގެ ރަސްމިއްޔާތުގައި ވާހަކަދައްކަވަމުން އެމްޓީސީސީގެ ޗެއާމަން މުހައްމަދު އަފީފް، ބައިވެރިންނާ މުހާތަބުކުރައްވައި ވިދާޅުވީ، އެމްޓީސީސީއަކީ ރައްޔިތުންގެ އަދި އެމްޓީސީސީއަކީ އެމްޓީސީސީގެ ހިއްސާދާރުންގެ ކުންފުންޏެއް ކަމަށެވެ. އެމްތިސީސީއަކީ ހަމައެކަނި ސަރުކާރުގެ ކުންފުންޏެއް ނޫންކަން ފާހަގަކުރައްވަމުން ޗެއާމަން ވިދާޅުވީ، އެހެންކަމާއެކު ކަނޑައެޅިފައިވާ ވަގުތުތަކުގައި މަސައްކަތް ނިންމުމަކީ ވަރަށް މުހިއްމު ކަމެއްކަމަށެވެ.

ޗެއާމަން ވިދާޅުވީ އެމްޓީސީސީ މިހާރު އޮތީ ވަރަށް ރަނގަޅު ފައްތަރެއްގައި ކަމަށާއި، މިއަހަރު އެންމެ އެދެވޭ ނަތީޖާ ނުނެރެވުނު ނަމަވެސް ކުރިއަށް ހުރި އަހަރުތަކުގައި ރަނގަޅު ނަތީޖާތަކެއް ހާސިލްކުރެވިދާނެ ކަމަށް އޭނާ ވިދާޅުވިއެވެ.

އެމްޓީސީސީގެ ޗެއާމަން މުހައްމަދު އަފީފް

މި ހަފްލާގައި އެމްޓީސީސީގެ މެނޭޖިންގ ޑިރެކްޓަރު ރިޓަޔަޑް އަހުމަދު ސައުދީ ވިދާޅުވީ، ކުރާ މަސައްކަތުގެ ކޮލިޓީ ހިފަހައްޓައި ރައްޔިތުންނަށް ނުވަތަ ޕްރޮޖެކްޓްދޭ ފަރާތް މަސައްކަތް ހަވާލުކުރާގޮތަށް މަސައްކަތް ނިންމާލުމަކީ އެންމެ މުހިއްމު އެއް ކަންތައް ކަމަށެވެ. މިކަން ހާސިލްކުރުމަށް ސައިޓްތަކުގެ ސުޕަވައިޒަރުންގެ ހިއްސާ ބޮޑުކަން އޭނާ ވަނީ ފާހަގަކުރައްވާފައެވެ.

ސުޕަވައިޒަރުންގެ މަހާސިންތާ ނިމުމާއެކު ވަނީ ބައިވެރިންނަށް އެކަމުގެ ލިޔުން ހަވާލުކޮށްފައެވެ. 

އެމްޓީސީސީ ސުޕަވައިޒަރުންގެ މަހާސިންތާގައި ކުރިއަށްދިޔަ ސެޝަންތަކުގައ،ި މަޝްރޫޢުތައް ހިންގުމުގެ މުހިއްމު މައުލޫމާތުތައް ވަނީ ދީފައެވެ. އަދި ސުޕަވައިޒަރުންގެ ހުރި މައްސަލަތަކަކީ ކޮބައިތޯ ބަލައި ސުޕަވައިޒަރުންގެ ހުރި ސުވާލުތަކަށް ވަނީ ޖަވާބުދީފައެވެ. 

މިއީ އެމްޓީސީސީން މިގޮތަށް ބޭއްވި ތިންވަނަ މަހާސިންތާއެވެ. އެމްޓީސީސީން ބުނީ ކުންފުނީގެ މުއައްޒަފުންނަކީ އެންމެ މުހިއްމު ރައުސުލްމާލު ކަމަށާއި، މިފަދަ ހޭލުންތެރިކަމުގެ ފޯރަމްތަކުގެ އިތުރުން، ކުންފުނީގެ މުއައްޒަފުންގެ ކުރިއެރުމަށް ސްކޮލަރޝިޕާއި ޓްރޭނިން ފުރުސަތުތައް ފަހިކޮށްދިނުމަކީ ކުންފުނިން ވަރަށްބޮޑު ސަމާލުކަމެއްދީގެން ކުރަމުން އަންނަ ކަމެއްކަމަށެވެ.

އެމްޓީސީސީން ވަނީ ވޭތުވެދިޔަ އަހަރު 1603 މުއައްޒަފުންނަށް އެކި ދާއިރާތަކުން 22،143 ގަޑިއިރުގެ ތަމްރީން ދީފައެވެ.