އިންޓަރނޭޝަނަލް އެޓޮމިކް އެނަރޖީ އޭޖެންސީ (އައި.އޭ.އީ.އޭ) ގައި ދިވެހިރާއްޖެއިން ބައިވެރިވުމަށް ރުހުންދޭން މަޖިލީހުގެ ޚާރިޖީ ގުޅުންތަކާބެހޭ ކޮމިޓީން ފާސްކޮށްފިއެވެ.
ރާއްޖޭގައި ގާއިމް ކުރުމަށް ނިންމާފައިވާ ކެންސަރު ހޮސްޕިޓަލްގެ މަސައްކަތުގައި އެހީ ހޯދުމަށް އައިއޭއީއޭގައި ބައިވެރިވުމަށް ނިންމާފައިވާކަން ސަރުކާރުން ހާމަކުރީ މިިދިޔަ ސެޕްޓެމްބަރު މަހުގެ 1 ވަނަ ދުވަހުއެވެ.
އޭރު ފޮރިން މިނިސްޓަރުގެ މަގާމުގައި ހުންނެވި މިނިސްޓަރު މޫސާ ޒަމީރު ވިދާޅުވި ގޮތުގައި އެޓޮމިކް އޭޖެންސީގައި ބައިވެރިވާން ވަޒީރުންގެ މަޖިލީހުން ނިންމި އެންމެ ބޮޑު ބޭނުމަކީ ރައީސް ޑރ.މުހައްމަދު މުއިއްޒު ހާއްސަ އިސްކަމެއް ދެއްވައިގެން ރާއްޖޭގައި ގާއިމުކުރަން މަސައްކަތް ކުރައްވަމުން ގެންދަވާ ކެންސަރު ހޮސްޕިޓަލު އެޅުމަށް މަގުފަހި ކުރުމެވެ.
ކެންސަރުގެ ފަރުވާއަށް ބޭނުންވާ ރޭޑިއޭޝަން ތެރެޕީ ފޯރުކޮށްދިނުމަށް ބޭނުންވާ އާލާތްތައް ހޯދުމާއި ވޭސްޓް މެނޭޖު ކުރުމަކީ އައިއޭއީއޭގެ މެންޑޭޓުގެ ތެރޭގައި ހިމެނޭ ކަމެކެވެ. މި ސަރަހައްދުގެ ގައުމުތަކުގެ ތެރެއިން މި އޭޖެންސީގައި މިހާތަނަށް ބައިވެރިވެފައި ނުވަނީ ރާއްޖެއާއި ބޫޓާނުންކަން ފާހަގަކުރައްވައި މިނިސްޓަރ ޒަމީރު ވިދާޅުވީ އެޓޮމިކް އެނާޖީއާ ދިމާއަށް ގިނަ ގައުމުތަކުގެ މިސްރާބު ހުރިއިރު ރާއްޖެއަށް ފައިދާ ހޯދޭނެ އިތުރު މަގުތައް ވެސް މިކަމުގެ ސަބަބުން ތަނަވަސް ވެގެންދާނެ ކަމަށެވެ.
އައިއޭއީއޭގައި ރާއްޖެއިން ބައިވެރިވުމާމެދު ގޮތެއް ނިންމުމަށް މަޖިލީހުގެ ރުހުން ހޯއްދެއްވުމަށް ރައީސް ޑރ.މުހައްމަދު މުއިއްޒު ވަނީ މަޖިލީހަށް ފޮނުއްވާފައެވެ.
އެއާއެކު އެ މައްސަލަ ޚާރިޖީ ގުޅުންތަކާބެހޭ ކޮމިޓީއަށް ފޮނުވާފައިވާއިރު، އެ ކޮމިޓީގައި މިއަދު ބޭއްވި ބައްދަލުވުމުގައި، މައްޗަންގޮޅީ އުތުރު ދާއިރާގެ މެންބަރު އިބްރާޙީމް މުހައްމަދު (އިއްބެ ޖަނާބު) ވަނީ ބަވަނަ ވަމުންދާ މިފަދަ ޒަމާނެއްގައި އައިއޭއީގައި ބަްިވެރިވުމުގެ މުހިންމުކަން ފާހަގަކުރައްވާފައެވެ.
އަދި އެކަމަށްޓަކައި މަޖިލީހުގެ ރުހުންވޭހާވެސް އަވަހަށް ދިނުމަށް އިއްބެ ވަނީ އެދުވަޑައުގެންފައެވެ.
އެއާއެކު އައިއޭއީގައި ބައިވެރިވުމަށް ރުހުންދޭން ގުރައިދޫ ދާއިރާގެ މެންބަރު ހަނާން މުހައްމަދު ވަނީ ހުށަހޅުއްވާފައެވެ. ހަނާންގެ ހުށަހެޅުމަށް މާފަންނު ދެކުނު ދާއިރާގެ މެންބަރު އަބްދުالله ރިފާޢު ތާއީދު ކުރެއްވުމުން ވޯޓަށް ވަނީ އަހާފައެވެ.
އަދި ކޮމިޓީގެ އިއްތިފާގުން ވަނީ މި ކަމަށް ރުހުންދޭން ފާސްކޮށްފައެވެ.
Advertisement
This content is created and paid for by advertisers and does not involve Voice Journalists
