އިޒްރާއީލުން ފަލަސްތީނުގެ ޣައްޒާއަށް ދެމުންގެންދާ ހަމަލާތައް ވަގުތުން ވަގުތައް ހުއްޓާލަން ޖެހޭކަމަށް ފްރާންސުން އެކުވެރި ދައުލަތްތަކަށް ކަނޑައަޅާފައި ހުންނަވާ އެމްބެސެޑަރު ނިކޮލަސް ޑި ރިވިއާ ވިދާޅުވެއްޖެއެވެ.
އިޒްރާއީލުން ޣައްޒާއަށް ދެމުންދާ ހަމަލާތަކާ ގުޅޭގޮތުން އދ ގެ ސެކިއުރިޓީ ކައުންސިލުން ބޭއްވި ކުއްލި ބައްދަލުވުމެއްގައި ވާހަކަދައްކަވަމުން ނިކޮލަސް ވިދާޅުވީ، އިޒްރާއީލުން ޣައްޒާގައި ހިންގަމުންދާ ޖަރީމާތައް ހުއްޓާލައި، ބަންދުކޮށްފައިވާ އަސީރުން ދޫކޮށްލައި ޣައްޒާގައި އިންސާނީއްޔަތަށް މަސައްކަތްކުރާ ފަރާތްތަކަށް ފުރުސަތުދޭން ޖެހޭ ކަމަށެވެ.
އޭނާ ވިދާޅުވީ ޣައްޒާގެ ހާލަތު މިވަގުތު އޮތީ ވަރަށް ގޯސްކޮށް ކަމަށާއި، ޣައްޒާއަށް އިތުރަށް ހަމަލާތައް ދިނުމަކީ ބަލައިގަނެވޭނެ ކަމެއް ނޫންކަމަށެވެ.
އދ ގައި ހުންނަވާ ފްރާންސްގެ އެމްބެސެޑަރު މިމޭރުމުން ވާހަކަދައްކާފައިމިވަނީ ވޭތުވެދިޔަ 24 ގަޑިއިރުގެ ތެރޭގައި އިޒްރާއީލްގެ ނިރުބަވެރިންގެ ހައްދުފަހަނަ އަޅާފައިވާ ހަމަލާތަކެއްގައި ޣައްޒާގެ 65 މީހަކު ޝަހީދު ކޮށްލާފައިވާ ވަގުތެއްގައެވެ. އީރާނާއި، ލުބުނާނުން އިޒްރާއީލްގެ ނިރުބަވެރިންނަށް ދޭ ހަމަލާތައް އިތުރުކުރުމާއެކު، ނުރުބަވެރިން ވަނީ ގޮތެއްފޮތެއް ނުބަލައި ޣައްޒާގެ އެތަންމިތަނަށް ހަމަލާތައްދޭން ފަށާފައެވެ.
ނިރުބަވެރިންގެ ހަމަލާތަކުގައި އދ ގެ އޮފިޝަލުންނާއި ނޫސްވެރިން އަމާޒުވަމުންދާއިރު، ސްޕެއިނުންވެސް ވަނީ އިޒްރާއީލްގެ އުދުއާންތައް ބަލައި ނުގަނެވޭނޭކަމަށް ބުނެފައެވެ. ނިރުބަވެރިން މިދިޔަ ހަފްތާގައި ވަނީ އަލްޖަޒީރާގެ ކެމެރާމަނަކަށް އަމާޒުކޮށްގެންވެސް ހަމަލާއެއް ދީފައެވެ.
Advertisement
This content is created and paid for by advertisers and does not involve Voice Journalists
