ދުންފަތް ބޭނުންކޮށްގެން ތައްޔާރުކޮށްފައި ހުންނަ ސިނގިރޭޓާއި ބިޑި ފަދަ ތަކެތިން އިމްޕޯޓް ޑިއުޓީ ބޮޑުކުރުމުން އަންނަ އަހަރުން ފެށިގެން އެ ބާވަތްތަކުން އެކަނިވެސް ދައުލަތަށް އާމްދަނީގެ ގޮތުގައި ބިލިއަނަކަށްވުރެ ގިނަ ރުފިޔާ ލިބޭނޭކަމަށް ލަފާކޮށްފިއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ވޭޕް މަނާކޮށް ދުންފަތުގެ ބާވަތްތަކުން އުފައްދާފައިހުންނަ ސިނގިރޭޓް ފަދަ އެއްޗެހިން ނަގާ ޑިއުޓީ ބޮޑުކުރުމަށް ނިންމަވާފައެވެ. ރައީސުލްޖުމްހޫރިއްޔާގެ އެ ނިންމެވުމާ ގުޅިގެން ސަރުކާރުގެ ފަރާތުން ވަނީ، ދުންފަތާއި ދުންފަތް ބޭނުންކޮށްގެން ތައްޔާރުކޮށްފައި ހުންނަ ސިނގިރޭޓާއި ބިޑިން ނަގާ ޑިއުޓީ އިތުރުކުރުމަށް މަޖިލީހަށް ބިލެއް ހުށަހަޅާފައެވެ.

ސަރުކާރުގެ ފަރާތުން މި ބިލް ހުށަހެޅުއްވީ، މައްޗަންގޮޅީ އުތުރު ދާއިރާގެ މެންބަރު އިބްރާހީމް މުހައްމަދެވެ.

Advertisement

މި ބިލްގައި ވާގޮތުން ޑިއުޓީއަށް ގެންނަ ބަދަލާ ގުޅިގެން މިއަހަރުގެ ތެރޭގައި 180 މިލިއަން ލިބޭނޭކަމަށް ލަފާކުރެވުނު ނަމަވެސް ކުރިއަށް އޮތް 2025 ވަނަ އަހަރުގެ ތެރޭގައި 1.05 ބިލިއަން ރުފިޔާއަށް އަރާނޭކަމަށެވެ.

އާމްދަނީގެ ގޮތުގައި ލިބޭނޭކަމަށް އަންދާޒާކޮށްފައިވާ އަދަދު

މި ބިލާ ގުޅޭގޮތުން ބަންޑާރަނައިބު އަހުމަދު އުޝާމް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ،  ގާނޫނަށް ހުށަހަޅާފައިވާ އިސްލާހަކީ 1 ނޮވެމްބަރ އިން ފެށިގެން 15 ނޮވެމްބަރ 2024 މި މުއްދަތުގެ ތެރޭގައި އެތެރެކުރާ ވޭޕްކުރުމަށް ބޭނުންކުރާ ތަކެތީގެ ޑިއުޓީ ބޮޑުކުރުމަށް ހުށަހަޅާފައިވާ އިސްލާހެއް ކަމަށެވެ.

މި އިސްލާހުގައިވާގޮތުން ވޭޕްފަދަ އާލާތަކަށް އަޅާ ފްލޭވާއާއި ކެމިކަލްއިން ނަގާ ޑިއުޓީ ވަނީ 50 އިންސައްތަ ބޮޑުކުރުމަށް ނިންމާފައެވެ. އެއީ މިލިލީޓަރަކަށް 8 ރުފިޔާގެ މަގުންނެވެ. މީގެ އިތުރުން ހީޓް ޓޮބޭކޯ ޕްރޮޑަކްސް ނުވަތަ ރޯކުރުމަކާ ނުލައި ހޫނުކޮށްގެން ބޭނުންކުރެވޭގޮތަށް އުފައްދާފައި ހުންނަ ދުންފަތުގެ އުފެއްދުންތަކުންވެސް ވަނީ ޑިއުޓީގެ ގޮތުގައި 50 އިންސައްތަ ބޮޑުކުރުމަށް ނިންމާފައެވެ. އެއީ ސްޓިކަކުން ނަމަ 8 ރުފިޔާއެވެ.

ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ދިވެހިރާއްޖެއަށް އެތެރުކުރުން 15 ނޮވެމްބަރ 2024 އިން ފެށިގެން މަނާ ކުރުމަށް ރައީސް ޑރ މުހައްމަދު މުއިއްޒު ނިންމެވިކަން އިއުލާންކުރެއްވީ މިހިނގާ އޮކްޓޯބަރުމަހުގެ 14 ވަނަ ދުވަހުއެވެ.