އިސްރާއީލުން ރޭގެ ވަގުތެއްގައި އީރާނުގެ ތެހެރާނަށް ދިން ހަމަލާތަކުގައި މާބޮޑު ގެއްލުމެއް ލިބިފައި ނުވާކަމަށް އީރާނުން ބުނެފިއެވެ.
އީރާނުގެ ޤައުމީ ޓީވީން ވަނީ އިސްރާއީލުން ރޭގެ ވަގުތެއްގައި ތެހެރާނަށް ވައިގެ ހަމަލާތަކެއް ދީފައިވާކަން ޔަގީންކޮށްދީފައެވެ. އިސްރާއީލުން ހަމަލާތައް ދީފައިވަނީ އިލާމްއާއި ޚުޒެސްތާނުގެ ތަންތަނަށެވެ. އިސްރާއީލުން ބުނީ ހަމަލާތައް އަމާޒުކުރީ އީރާނުެ އަސްކަރިއްޔާގެ މަރުކަޒުތަކަށް ކަމަށެވެ.
އިސްރާއީލުގެ ހަމަލާތަކާ ގުޅޭގޮތުން އީރާނުގެ މީޑިއާތަކުން ވަނީ ހަމަލާތަކުގައި މާބޮޑެތި ގެއްލުންތަކެއް ލިބިފައިނުވާކަމަށް ރިޕޯޓްކޮށްފައެވެ. އަދި ގިނަ ހަމަލާތައް ވަނީ އީރާނުގެ މިސައިލްތަކުން ދިފާއުވާ ސިސްޓަމުން ވައިގެ ތެރެއަށް ގޮއްވާލާފައިކަމަށްވެސް މީޑިއާއިން ބުންޏެވެ.
އީރާނުގެ އިސްލާމިކް ރިވޮލިއުޝަނަރީ ގާޑް ކޮޕްސް އާ ގުޅިފައިވާ މީޑިއާއެއް ކަމަށްވާ ތަސްނީމް ނިއުސް އޭޖެންސީން ބުނީ، އީރާނުގެ 20 ތަނަކަށް އިސްރާއީލުން ހަމަލާތައް ފޮނުވާލިކަމަށް ބުނިނަމަވެސް އެއީ ކަނޑައެޅިގެން ދޮގެއް ކަަމަށެވެ. އިސްރާއީލުން ފޮނުވާލި މަދު ހަމަލާއެއް އަމާޒުވިނަމަވެސް ލިބުނީ ވަރަށް ކުޑަކުޑަ ގެއްލުންތަކެއް ކަމަށް އެފަރާތުން ބުންޏެވެ.
އީރާނުގެ ޤައުމީ ޓީވީން ވަނީ މިއަދު ހެނދުނު ތެހެރާންގެ މަގުތަކުގައި އެހެންދުވަސްދުވަހެކޭ އެއްގޮތަށް އާއްމު ރައްޔިތުން ކަސްރަތު ކުރުމަށާއި، އެނޫންވެސް ބޭނުންތަކުގައި ނިކުމެ އުޅޭ މަންޒަރު ދައްކާފައެވެ.
އިސްރާއީލުން ދިން ހަމަލާތަކާ ގުޅޭގޮތުން އީރާނުގެ ނައިބުރައީސް މީގެ ކުޑައިރުކޮޅެއް ކުރިން އެކްސްގައި ކުރި ޕޯސްޓެއްގައި ވިދާޅުވީ، އީރާނުން ދުޝްމަނުން ބަލިކުރާނޭކަމަށެވެ.
އިސްރާއީލުން އީރާނަށް ރޭ ދިން ވައިގެ ހަމަލާތަކާ ގުޅިގެން ބައިނަލްއަޤްވާމީ އެއާލައިންތަކުން ވަނީ, ތެހެރާނަށް ކުރަމުންއައި ވައިގެ ދަތުރުތައް ވަގުތީގޮތުން ހުއްޓާލާފައެވެ. ނަމަވެސް އީރާނަށް ނިސްބަތްވާ ގިނަ އެއާލައިންތަކުން ދަތުރުތައް ކުރިއަށްގެންދާކަމަށް އެޤައުމުގެ އިމާމް ހާމަނާއީ އެއާޕޯޓުން ބުނެއެވެ.
މެދުއިރުމަތީގެ ބައެއް ނޫސްތަކުން ބުނާގޮތުގައި ރައްދުގައި އިސްރާއީލަށް ހަމަލާދިނުމަށް އީރާނުން މިހާރު ދަނީ ތައްޔާރުަމުންނެވެ.
Advertisement
This content is created and paid for by advertisers and does not involve Voice Journalists
