އިސްރާއީލުން އީރާނަށް އަމާޒުކޮށް ރޭ ދިން ވައިގެ ހަމަލާތައް ރާއްޖެއިން ކުށްވެރިކޮށްފިއެވެ.
އެކަމާ ގުޅޭގޮތުން ދިވެހި ހާރިޖިއްޔާއިން ނެރެފައިވާ ބަޔާނުގައި ބުނެފައިވަނީ، އިސްރާއީލުން އީރާނުގެ ތެރެއަށް ދިން ހަމަލާތައް ހަރުކަށި އިބާރާތުން ކުށްވެރިކުރާ ކަމަށާއި، އިސްރާއީލުން އީރާނުގެ އިސްތިގްލާލަށް އަރައިގަނެފައިވާކަމަށެވެ. އަދި އެ ހަމަލާތައް ދީފައިވަނީ ބައިނަލްއަޤްވާމީ ގޮތުން ހެދިފައިހުރި ޤާނޫނުތަކާ ކަންކަން ކުރަން އޮންނަ ހަމަތަކާ ހިލާފަށްކަމަށެވެ.
ހާރިޖިއްޔާއިން ވަނީ އިސްރާއީލުން މެދުއިރުމަތީގެ ހަމަޖެހުން ނަގާލުމަށް ހިންގާ މިފަދަ ޖަރީމާތައް ހުއްޓާލުމަށް ގޮވާލައި މިކަމުގައި ބައިނަލްއަޤްވާމީ ގޮތުން ކުރެވެންހުރި ކަންކަން ކުރުމަށްވެސް ގޮވާލާފައެވެ.
އިސްރާއީލުން ރޭ ދިން ވައިގެ ހަމަލާތަކުގައި އީރާނުގެ ދެ ސިފައިންގެ އޮފިސަރަކު މަރުވިކަމަށް އީރާނުން ވަނީ ބުނެފައެވެ. ހަމަލާތަކާ ގުޅިގެން އީރާނުގެ ހާރިޖިއްޔާއިން ބުނެފައިވަނީ، އެޤައުމުން އިސްރާއީލަށް ހަމަލާދޭނެ ކަމަށާއި އެކަން ކުރާނީ އެންމެ ރަނގަޅު ވަގުތުގައި ކަމަށެވެ.
އިސްރާއީލުން ހަމަލާތައް ދީފައިވަނީ އިލާމްއާއި ޚުޒެސްތާނުގެ ތަންތަނަށެވެ. އިސްރާއީލުން ބުނީ ހަމަލާތައް އަމާޒުކުރީ އީރާނުެ އަސްކަރިއްޔާގެ މަރުކަޒުތަކަށް ކަމަށެވެ.
އިސްރާއީލުގެ ހަމަލާތަކާ ގުޅޭގޮތުން އީރާނުން ވަނީ ހަމަލާތަކުގައި މާބޮޑެތި ގެއްލުންތަކެއް ލިބިފައިނުވާކަމަށް ބުނެފައެވެ. އަދި ގިނަ ހަމަލާތައް ވަނީ އީރާނުގެ މިސައިލްތަކުން ދިފާއުވާ ސިސްޓަމުން ވައިގެ ތެރެއަށް ގޮއްވާލާފައިކަމަށްވެސް އެގައުމުން ބުންޏެވެ.
Advertisement
This content is created and paid for by advertisers and does not involve Voice Journalists
