ޕްރޮސެކިއުޓަ ޖެނެރަލް (ޕީޖީ) އޮފީހުގެ ކުރީގެ ނިންމުންތަކާ މެދު ޝަކުވާ ހުށަހަޅަން ހުޅުވާލި ފުރުސަތުގައި 500އަށް ވުރެ ގިނަ ޝަކުވާ ލިބިފައިވާ ކަމަށް އެ އޮފީހުން މިއަދު ބުނެފި އެވެ.
ޕީޖީ އޮފީހުން ބުނިގޮތުގައި މުރާޖަޢާ ކުރުމަށް ކޮމިޓީއަށް ލިބިފައިވަނީ 539 ޝަކުވާ ކަމަށާއި މި ޝަކުވާތައް މިހާރު ދަނީ މުރާޖަޢާކުރަމުންނެވެ.
ޕީޖީ އޮފީހަށް ހުށަހެޅިފައިވާ ދަޢުވާތަކާއި، ހައްޔަރުކޮށްފައި ނުވަތަ ބަންދުކޮށްފައި ތިބި މީހުންގެ ބަންދު މުރާޖަޢާކުރުމަށް އެދި ހުށަހެޅުމުގެ ފުރުޞަތު 1 އޮކްޓޫބަރު 2024 އިން ފެށިގެން 20 ދުވަހުގެ މުއްދަތަށް އެ އޮފީހުން ހުޅުވާލިއެވެ.
އެ މައްސަލަތައް މުރާޖަޢާ ކުރުމުގެ ކަންކަން ކޮމިޓީ އަކުން ކުރާއިރު، އެ ކޮމިޓީގެ މައިގަނޑު މަސައްކަތަކީ މިހާރު ކޯޓަށް ހުށަހެޅިފައިވާ ދަޢުވާތަކާއި، ޖިނާއީ ކުށްތަކާ ގުޅިގެން ހައްޔަރުކޮށް ނުވަތަ ބަންދުކޮށްފައި ތިބި މީހުންގެ ބަންދު މުރާޖައާކުރުމަށް އެދި ހުށަހަޅާ ހުށަހެޅުންތަކާމެދު ޤާނޫނުއަސާސީއާއި، ޤާނޫނާއި، ކަމާ ގުޅުންހުރި ގަވާއިދުތަކުގެ އިމުގެ ތެރެއިން ގޮތެއް ނިންމައި، އެކަންކަމުގައި ޢަމަލުކުރަންވީ ގޮތުގެ ލަފާ ޕްރޮސިކިއުޓަރ ޖެނެރަލްއަށް އެރުވުމެވެ. އަދި އެ ނިންމުންތައް ބަދަލުކުރަންޖެހޭނަމަ އެކަން ކުރުމެވެ.
Advertisement
This content is created and paid for by advertisers and does not involve Voice Journalists
